Mizoram Pradesh Congress Committee (MPYCC) huaihawtin nimin khan CTI Sesawngah Martarte Lungphun kum 26-na champha hriatrengna hman a ni a. Martar lungphunah hian Congress Legislature Party (CLP) Leader Zodintluanga Ralte, MPYCC hruaitu hlui leh MLA ni mekten pangpar an dah.
Volunteers Building, CTS Sesawnga Martar Lungphun champha puala inkhawmah MPYCC President hlui leh Martar lungphun tura sulsutu John Rotluangliana chuan, Mizoramin remna leh muanna a neih chhan chu Congress vang leh a hun laia chief minister Lal Thanhawla’n chief minister nihna a ken vang a nih thu a sawi a. “Chief minister thuthleng inken hi thil har tak a ni tih kan hre vek a. Mizoram tan Zofate tan a remna siamtu Pu Lal Thanhawla hi theihnghilh chi a ni tawh lo a, sawi nep chi a ni lo,” a ti.
John Rotluangliana chuan remna nena an lo haw hnuah pawh MNF party hruaituten martar-te lung phun tumna an nei lo kha ngaituah tithui tak a nih thu a sawi.
CLP Leader Zodintluanga Ralte chuan Sesawng CTI hmuna Martar Lungphunah hian ram buai avanga nunna chân mi 1,168-te hming ziah lan a ni a, Congress sorkar kha khatih hun lai khan lo piang lo phei se chuan tun a an lungphun a hming an ziah let hi ziah a ngaih hial a rin thu sawi.
Congress thalai atanga inchherchhuak Congress mi leh sa tam tak an awm tawh tih sawiin CLP leader chuan, “Minister leh MLA pawh thahnem tak an awm a. Tuna Congress hruaitu tam zawk hi thalai atanga chhuak an ni,” a ti.
MPYCC President Laltawnliana pawhin thu sawiin ram leh hnam tana nunna chân tate chu thangtharte thinlungah an dai tawh ngai dawn lo a, hriatreng an nih tawh tur thu a sawiin, “Kum 1997-a kan din Martar-te Lungphunah hian politics a awm lo tih hi Zoram mipuiten min hriat nawnsak se ka duh a. Politics khelh nana Martar-te hman chin chu thil tha lo leh thil tih chi loh a ni,” a ti.
Thlan lungah hian politics a tel miah lo tih sawiin Laltawnliana chuan, “MNF-te ramhnuai atanga an rawn chhuah atanga kum 11 zet chhungin Martarte hriatrengna lung a awm lo,” tia sawiin, ram tana maichamah an thisen hlu tak dahkhamtute tan Congress thalai chuan he lungphun hi an din ta mai niin a sawi.
MPYCC in an tar lan danin, Martar Lungphun hmasa ber hi June 27, 1997 khan khatih laia Congress President Lal Thanhawla’n a hawng a. Ram buai laia hnam sipai leh civil mi nunna chante hming vawiin thleng hian mi 1,168 ziah lan a ni tawh.