Atlanta Hawks chuan an team insiksawina tura salary cap-ah thawl zawka an chet theihna turin forward John Collins chu Utah Jazz hnenah an kaltir.
Hawks hian Collins an ‘trade’ naah hian forward Rudy Gay leh second-round draft pick an dawng a. Collins hi a contract neihlaiah season thum chhunga Dollar maktaduai 78 hlawh tur a ni a. An inremna avangin NBA dan angin ‘trade exception’ an nei thei a, tun season lo awm tura an salary cap-ah Dollar maktaduai 25 vel laiin an thawl phah thei dawn.
Hetihlai hian lehlamah Jazz in kum 25 mi forward chhawr Collins an neih belh a. Center leh power forward a khel thei Collins hi All-Star Lauri Markkanen leh All-Rookie center Walker Kessler te nen an ‘front court’-ah an inkawp dawn tihna a ni.
Tun NBA draft-ah Taylor Hendricks an thlang bawk a. Tun season liamta a offense hmuhnawm an khelh avanga beisei khum a che tha Jazz in defence a hmasawnna turin ‘front court’ nghet zawk an nei thei tawh dawn a. Hei vang hian tun dinhmunah Western Conference playoffs khel tura rinkai zingah tam tak ngaihah an tel phah.