Albuquerque, New Mexico, United States-a Inrinni zinga hot air balloon thlawkin power line a sut avanga tlaah mi panga an thi.
Police department chuan mi an chuanna basket leh a thlawh kânpuitu balloon chu kehin a tla tih an sawi.
Thil thleng hmutute chuan balloon hi thep vekin leiah a tla tih Twitter-ah an tar lang bawk.
He thil thleng avang hian a power line sutin a chawm mi 13,000 chuangin hun rei tak power supply an neih loh phah bawk.
Balloon hian power line hi an ram sanaa Inrinni zing dar 7:00 (India rama tlai dar 6:30) velah a su tih police thupuangtu, Gilbert Gallegos chuan a sawi.
An tlakna hmunah hian a khalhtu nen mipa pahnih leh hmeichhe pahnih an thi nghal a. A chuang ve dang pakhat chu hliam na tak tuar chunga damdawi ina lak a nih hnuah a thi zui.
Federal Aviation Administration (FAA) chuan basket hi ft 100 vela sang a\angin khawlaiah a tla a, a kâng zui bawk niin an sawi a. Balloon erawh a la thlawk zui deuh tih an sawi bawk.
A tlakna bul hnaia lo awm, Joshua Perez chuan rang takin a tlakna lai hi mi dang pakhat nen an pan nghal a, propane tank chu tihtawp (off) tumin an bei nghal a. Perez hian hetih lai hian basket chhunga awmte chu tumah an che lo niin KOB4 News hnenah a sawi.
“Hetianga balloon tla han hmuh chu rilru a hrehawm duh tak zet a ni,” a ti.
Chetsualna thlen chhan hi FAA leh National Transportation Safety Board chuan an chhui zui nghal mek.