Kum liam ta chhungin Switzerland ram tiat zeta zau ramngaw tha lai (tropical forest)-a thing hloh a ni a, hloh zat a pung zel tih zirchianna tharah tar lan a ni.
COP26 an tiha khawvel ram hruaituten ramngaw thiah titawp tura an intiamna chuan kawng dik a la zawh lo tihna a ni.
Kum 2022 chhung khan minute tin football khelmual 11 tiat zeta zau ramngaw chân zel ang a ni a, Brazil ram chu a thiat nasa ber an ni.
Hetih lai hian Indonesia-a ramngaw chân zat chu a hma lamte aiin a zim hle a, hlawhtlinna lian taka ngaih a ni.
Kum 2021-a COP26 climate meeting-ah khan khawvela ram 100 chuang hruaitute chuan ramngaw chungchanga Glasgow Declaration an tih chu hming ziah hnanin tangruala ‘kum 2030-ah chuan ramngaw humhalh lai thiah leh chân leh leilung luangral nasa tihtawp’ an intiam.
Hemi tuma kal khawm hruaitute hi khawvel puma ramngaw awm 85% zeta roreltute an ni a. An zingah hian Brazilian president ni ta, Jair Bolsonaro pawh telin ani hi Amazon ramngaw tha tak mai thiah nasat thin tihziaawmna tura dan zam leh kenkawh thin thlahzaltu a ni.
Glasgow pact hi kum 2014-a hetiang deuh bawka an intiam tawhna, hlawhchham ta si puitlin ngei tuma intiamna a ni.
Tunah hian Global Forest Watch chuan zirchianna thar an tichhuak ta a, Glasgow khawpuia intiamna ang erawh kalpui a ni lo hle tih hmuh theih a ni.
Ramngaw tha (tropical primary forest) chân hi khawvel lum zel leh a chhunga chengte tan thil buaithlak tak a ni mek.
Brazil, Democratic Republic of Congo leh Indonesia-a rainforest-te hi khawvela mihring tana tha lo boruak (greenhouse gas) hiptu tha ber ber an ni.
Heng ramngaw upa tawh tak tak thiah leh hal hian carbon an lo khawl ngar ngar tawh chu boruakah a tichhuak a, chu chuan khawvel pum a tilum ta thin a ni.
Heng ramgawte hi khawvela thil nung awmte tan a tangkai a, mihring maktaduai tam takin nunkhawchhuahna bul an ni bawk.
Scientist-te chuan hetianga thil nungte inmamawh tawnna (ecosystem service) hi thing phun belh chauh lo chuan tihthar ngaihna a awm lo tih an sawi a, ramngawte pawh kum tam tak chhunga insiam chauh a ni tih an sawi.
University of Maryland-in a lak khawm behchhana data tihchhuahah hian kum 2022 chhung khan ramngaw tha hi kum 2021 aiin 10% zetin hloh tam a ni a, heng zinga hectare maktaduai 4 bial chauh hi amaha tlu emaw, hal emaw a ni a, a bak chu mihring thiah vek a ni.
Nikum chhunga ramngaw thiah takten carbon dioxide an tihchhuah zat chu India-in kum khata fossil fuel atanga boruak tha lo a tihchhuah zat zet a tlin thu an tar lang bawk.
“Zawhna awm ta chu, kum 2030-a ramngaw thiah titawp turin a kawng kan zawh tak tak em? A chhanna awlsam tak chu ‘zawh lo’ tih a ni,” tiin Global Forest Watch kalpuitu, World Resources Institute (WRI)-a mi, Rod Taylor chuan a sawi.
“Khawvel pumah kan zawh lo tur kawngah kan kal a, kawng dik lo kan zawh a. Kan zirchiannaa a lan danah chuan khawvelah kum 2022 chhung khan kum 2030-a ramngaw thiah titawp a tahtawla kal turin a tlemna tur zat aia hectare maktaduai khat chuang zeta tam kan la thiat a ni,” a ti.
Brazil chu ram pakhata tropical forest hloh tam ber niin kum hmasa aiin 2022-ah hian 14% chuangin an thiat tam zawk.
Amazonas state an tih, Brazil-a an ramngaw tha zahve zet awmnaah phei chuan kum thum chhungin a let dawnin ramngaw an thiah zat a pung zawk.
Glasgow Declaration-a hming ziak ve lo zinga mi, Bolivia pawh kum 2022 chhunga ramngaw thiah lama pung nasa a, kum khat chhungin a let thum dawnin a thiat zau.
Zirchiangtute chuan lo neihna atana hman chu a tichhetu nasa ber niin an sawi a. Kum zabi thar intan atang khan bekang an chinna atan Bolivia-ah hian ramngaw hectare maktaduai tam tak thiah a ni tawh.
Africa khawthlang lama Ghana chu ramngaw tha bik tlem chauh an nei tawh a, kum 2022 chhung khan a hma kum aia 71% zeta zau an thiat a, a tam ber hi humhalh china mi a ni nghe nghe a. An thiah hmuh thenkhat hi cocoa chinna hmun bul hnai pawh a awm nual.
Brazil-ah hian president thar an nei a, ani hian kum 2030-a Amazon thiah chu tihtawp hmak a tum a, hei hian kum 2021-a Glasgow-a intiamna lo awm tawh chu a hlawhtlin theih nan beiseina thar a siam mek.
Hetih lai hian mi thiamte chuan khawvel hi 1.5°C zeta tun hma aia a lum tawh avangin tuna thapui thawh pawh hi a hun a tlai lek lek tawh niin an sawi.
“Tunah hian hmanhmawh theihtawpa chet a ngai tawh a, ramngaw thiah hi a tlem zel a ngai tawh,” tiin Taylor chuan a sawi.
“Ramngaw hi vawi khat i hloh tawh a nih chuan a neih leh chu har tak a ni tawh a, hmuh let leh theih loh thil hial a ni,” a ti bawk.