Aizawl: Maumual, Chaltlang rama MNF Returnee-te chenna in ngaihtuahsak tura din, ‘Maumual Development Committee for MNF Returnees’ chu nimin khan an chairman, Revenue Minister Lalruatkima hoin a pisa-ah an thukhawm a. He ramah khawpui felfai tak din a nih tur thu a sawi.
Lalruatkima chuan sorkarin Ex-MNA te in leh lo ngaihtuahsak a ngaih pawimawh avangin theihtawp chhuahin hmalak reng a nih thu a sawi a. Kum 1987-a siam tawh House Site Plan chu uluk leh tun lai thiamna changkang zawk hmanga siam that a nih thu a sawi a. Revenue department chuan surveyor tirin mumal taka survey neih vek tawhin, plot pawh siam fel a nih thu leh siam rem ngai la awm te pawh siam rem nghal zel tura hmalak a nih thu a sawi.
Revenue minister hian Maumual ram theh chu phase hnih a kalpui a nih thu a sawi a. Phase-I ah hian SEDP atangin Rs 5,00,000 dah niin, phase-II kalpui thuai a nih theih nan hmalak tan mek a nih thu sawiin, “Maumual ramah khawpui felfai tak din a ni dawn a, mi mal ram bakah hian mipui vantlang hmunhma tur – Anganwadi, School, taxi stand leh a tul dangte awmin, in tin chu kawngpui tha takin a pawh vek dawn a ni,” a ti.
Thutkhawmah hian Revenue department-in survey an neih atanga House Site Plan/Plot an siamte an thlirho bawk a. Ruahmanna ang chuan tun July thla lo awm tur chhung ngei a engkim peihfel tum a ni.
Thutkhawma tar lan a nih danin, Maumual ram chhunga ram nei in-report zat hi mi 863 an ni a. Report lut atanga House-Site Plan chhunga awm tih hriat mai theih hi 452 awmin, plan chhunga mi tih hriat mai theih loh 411 an awm mek a ni. Plot allotment siam zawng zawng chu 677 niin plot cancel leh a ram neitute kuta pek 61 a awm bawk.