Mizoram a awm mek Manipur raltlanten One Nation, One Ration Card (ONORC) programme hnuaiah an awmna hmunah ration buhfai an la thei tawh a, raltlan thenkhat chuan buhfai hi a thlawnin an dawng mek
Supply department hotuten The Zozam Times an hrilh danin Manipur raltlante chu ONORC hnuaiah ration buhfai pek theih ni mah se Manipur-ah internet tihtawp a nih avangin EPOS portal-ah data an hmu thei lo a, hei vang hian raltlante hi ration pek lawk theih an ni lo.
Hemi chungchang hi supply department hotute chuan sorkar laipui hotute hriattirin an harsatna tawh chu sutkiansak thuai turin an ngen a, Thawhtanni khan supply department chuan hriattirna dawngin EPOS portal data an hmuh loh avanga harsatna an tawh chu sutkian a nih tawh thu hrilh an ni a, Manipur raltlante chu ration buhfai pek chhuah tan an ni tawh.
Supply department hotuten an sawi danin, Manipur raltlan AAY card neite chuan buhfai kg 35 a thlawnin an la thei a, PHH card nei, mi pakhatin a thlawnin kg nga zel an la thei bawk a. Hriat theih chinah Darlawn khuaa Manipur raltlante chuan ONORC hnuaiah hian ration buhfai a thlawnin an dawng tawh a ni.
Ministry of Consumer Affairs, Food & Public Distribution hnuaia department of public distribution thuchhuak angin ONORC hnuaiah migrant NSFA beneficiary-ten India ram khawi hmunah pawh buhfai an la thei a, hemi bawhzui hian Mizoram sorkara supply department pawhin kumin May 25 khan Mizoram chhunga buhfai semtute chu India khua leh tui, raltlan zinga buhfai la- turte hnar lo turin alo hriattir tawh a, EPOS portal data hmuh theih loh avangin harsatna han awm deuh mah se tunah chuan Manipur raltlante hian an ration quota pangngai chân loin buhfai hi an la thei tawh a ni.