India chuan nimin khan Odisha tuipui kamah hlawhtling takin Agni series zinga mi nuclear ralthuam keng tel thei missile a enchhin.
Nuclear ralthuam pai thei, Agni Prime ballistic missile hi chawhma dar 10:55-ah Abdul Kalam Island launching complex IV atangin kah chhuah chhin a ni.
“Telemetry tam tak leh radar station ten khawchhak lama kah chhuah missile hi an vil zui reng a, a panna kawng kan ruahman ang zawng zawng a tihlawhtling,” tiin defence ministry chuan a tar lang.
“Agni P hi Agni zingah chuan chhuan (generation) thar niin a tunlai ber a. Km 1,000 atanga 2,000-a hla kap thleng thei,” niin an tar lang tel.
“Km 2,000-a hlaa awm bitum tura tih a kap fuh thei a, hetiang missile huang chhunga awm zingah chuan a têin a zangkhai ber a. Tunlai technology thar thei ang ber bera thuam a ni,” tiin Defence Research & Development Organisation (DRDO) thuneitute chuan an tar lang bawk.
Nilum July 25 khan DRDO chuan Odisha tuipui kam, Chandipur-a Multi-Barrel Rocket Launcher (MBRL) atangin ram chhunga siam chhuah 122mm Caliber Rocket chu hlawhtling takin a lo enchhin tawh bawk.
Hemi ni leh a hma chiahah ITR Chandipur atang thi hian MBRL-in ram chhunga siam chhuah Pinaka rocket pawh DRDO hian hlawhtling takin a lo enchhin ve tawh bawk a ni.