Aizawl Municipal Corporation, Board of Councillors nimina thukhawm chuan mihring chenna atanga feet 100 aia hnaiah vawk vulh khap a rel.
Aizawl Mayor Lalrinenga Sailo kaihhruai thutkhawmah hian Aizawl khawpui chhunga mihring chenna hnaih lutuka vawk vulhte titawp tura chak taka hmalak a remti a, mihring chenna atanga 100 feet aia hnaiah vawk vulh khap ni se, an ti a, tuna vawk vulh mekte ngai changin January 15, 2024 atanga kenkawh tan ni se tiin thutlukna siam.
Aizawl khawpui kawtthlera electric ban leh remchang danga TV cable, internet cable leh hrui dang zam hnawk chinfel nan khuahkhirhna dan (regulation) siam turin thutlukna siam bawk.
Heng bakah hian traffic jam tih ziaawmna tur leh mipui tana awlsam zawk turin Aizawla hmun remchang leh lun bikah te zan lamah bawlhhlawh khawn ni tawh se tiin thutlukna a siam a, hmun dangah chuan zing kara bawlhhlawh khawn kalpui mek hi a tul angin kalpui zel a la ni dawn a. Bawlhhlawh phur motor tinah helper dah ngei ngei nise a ti bawk a, dan zawm lo leh helper tel loa bawlhhlawh khawn khawm te chu na taka hrem ni se tiin BoC hian a rel a ni.
BoC thutkhawmah hian Lalringliana, Executive Councillor (Cash & Accounts) in AMC Financial Statement 2022-2023 a pharh a, chipchiar leh uluk taka sawi ho a ni.