Zuangtuia PCS&CA godown sawnna tura ruahman, SASCI leh NABARD atanga sum hmuh hmanga Sairanga FCS&CA godown thar pahnih sakna tur lungphum nimin khan Chief Minister Zoramthanga’n a phum.
Sairang Dinthar-a Horticulture Department hmunah lungphum phumna pual inkhawmah chief minister chuan Sairanga godown lian sak zawh a nih hnuah Zuangtuia kudam hlui chu tangkai taka hman tum a nih thu a sawi a. Kudam thar hi sak zawh a nih hunah rel lo lut tur nen awlsamna nasa zawk a thlen ngei a rin thu a sawi.
Chief minister chuan tun hmaa hmun remchang a la nih theih ringa Sairangah sorkarin ram a lo neiha FCI kudam lian tha tak sak mek chu vawiina lungphum phum tak FCS&CA kudam nen inhnaih taka a awm chu, buhfai phur chhuak a Mizoram hmun hranga sem darh kawnga nasa taka awlsamna a thlen dawn tih a sawi.
Buhfai phurtu lirthei lian kalnain khawpui chhung traffic a tihbuai lohnana bypass road siam a ni dawn tih sawiin, “PM-DeviNE kaltlangin bypass road siam a ni dawn a. Tunah hian Aizawl chhim lam atanga Mizoram hmar leh khawchhak panna tur ruahman mek a ni,” a ti.
Chief minister hian Mizoramin hamsawnna tura theihna tha tak a neih chu haichhuah dan thiam a, hma thlir thui tak neih pawimawh a tih a sawi a. Tum sang tak leh lian tak neih pawimawh thu leh Mizoramin tun hnaia harsatna hrang hrang a tawhte chu nasa zawka hmasawnna tur atan chona lian taka chan tir a tul tih a sawi bawk.
FCS&CA Minister K. Lalrinliana pawhin thu sawiin, Zuangtui kudam chu mipui tam zel leh khawpui thang zel avangin sawn a tul tak thu leh, Sairang Dinthar-a hmun tha hmuh a ni chu alwmawm a tih thu a sawi.
Kudam sakna tur hi SASCI leh NABARD atanga sum hmuh hmanga sak tur a ni a. SASCI 2022-23 atangin Rs 9,21,07,000 hmuh a ni a; NABARD atanga sum hmuh hi Rs. 4,85,94,000 niin, kudam pahnih hian 1000MT dawl zo ve ve tura sak tura ruahman a ni.