Indonesian khawpui pakhat, Makassar-a nimin khan Catholic biak ina inkhawm lai chu thihchilh bomb ni ngeia hriat hmanga beih a ni a, mi 14-in hliam an tuar niin police chuan an sawi.
Police-te chuan Tumkau Nia biak ina inkhawmnaa mi pahnih luh tumten bomb hi an tipuak niin an sawi.
Motorbike a chhe nasa hle a, a hmunah hian bomb paitu mi pahnih an thi niin an sawi bawk.
Tun hma atang tawhin Indonesia-ah hian Islamist helhovin biak in hi an bei fo tawh thin a; mahse, tun tuma mi hi chu eng pawl mahin an tihah an chhal lo.
Religious Affairs Minister Yaqut Cholil Qoumas chuan he beihna thleng a dem thu a sawi a, police-te chu sakhaw biakna hmuna venhimna tikhauh lehzual turin a ti.
“Beih a nih chhan chu eng pawh ni rawh se, eng sakhua mahin mi dangte tihnat hi a phal ngai lo,” a ti.
Bomb hi Tumkau Ni inkhawm bân lai, an ram sanaa chawhma dar 10:30 (India-a zing dar 9:00) pelh hnua puak a ni.
“Motorbike-a mi pahnih inphurin biak in gate-pui berah an tipuak a, a chhunga luh an tum zawk a ni,” tiin National Police thupuangtu, Argo Yuwono chuan a sawi.
Biak ina puithiam, Father Wilhemus Tulak chuan venhim hna thawktuten beitu pakhat zawk hi an man bet niin Metro TV hnenah a sawi.
A beitute hi motorbike-ah an inphur a, biak ina luh hi an tum niin a sawi bawk.
Police-te chuan mi 14 velin hliam an tuar niin an sawi a, an zingah hian biak ina thawh, a beitu biak ina luh tum dangtute pawh an tel.
Bomb hi biak in sira luhna bulah a puak a. Security camera atang chuan mei, a khu leh thil keh darh hmuh theih a awm.
Makassar Mayor Danny Pomanto chuan bomb hi a luhna pui bera puak chu ni se thi pawh an tam a rinawm thu a sawi.