Canada chuan an ram chanchina khaw lum ber tum tawngin khawthlang lamah a lum hle a. Hetih lai hian United States-a Pacific hmarthlang lam kam vel pawh khaw lum takin a tuam mek.
British Columbia-a Lytton-ah chuan Pathianni khan 46.6°C zeta lum niin kum 84 zet Canada-a khaw lum ber chhinchhiah chu a khum.
An ram chhung hmun dang dangah pawh tual chhung bila khaw lum ber ni an tawng nual hlawm.
US leh Canada ram hnihah hian mipuite chu tun kar chhung khaw lum tur avangin inringa inveng turin hriattir an ni.
Mi thiamte chuan sik leh sa inthlak nasa lutuk chuan khaw awm dan uchuak tak tak, khaw lum uchuak pawh a thlen niin an sawi a. Khawvel pum lum zel kaihhnawih niin an sawi bawk.
Khaw lum hi US-a California atanga Canada-a Arctic territory thlengin, Idaho kaltlangin a ni.
Air-conditioner leh fan bakah awm daihna hmun (cooling shelter) a lun hle a. Bar leh thingpui tih vel aiin swimming pool a lun zawk hle rih bawk.
Lytton hi Vancouver atanga hmarchhak lam km 250 vela awm niin Canadian record an khum a. July, 1937 daih tawhah khan Saskatchewan-a khaw pahnih, Yellow Grass leh Midale-ah chuan 45°C niin hei hi a lum ber thin a ni.
Lytton chauh a lum lo va, British Columbia-a hmun 40 chuang chuan anmahni bila record an lo neih an khum hlawm.
Environment Canada senior climatologist David Phillips chuan, “Record siam hi ka duh dan a ni a; mahse, hetiang chi hi chu a hrehawma a chi loh hle. Canada khawthlang lam hi Dubai aiin a lum zawk,” a ti.
47°C aiin lum thlen theihna hmun a awm nual niin a sawi lawk bawk.
British Columbia-a power pe chhuaktute chuan miin air-conditioner an hman nasat em avangin electric an hman pawh a tam phah hle tih an sawi.
Environment Canada chuan Alberta bakah Saskatchewan, Yukon leh Northwest Territories hmun thenkhat chu khaw lum theihna niin an sawi.
Inralrinna tur an tihchhuahah chuan khaw lum tak, hlauhawm leh tum dang aia lum zual chu tun karah a thleng dawn niin an sawi a, a nihna pangngai thin aia 10°C-15°C zeta lum, 40°C lai pawh hmun tam takah a ni dawn niin an sawi lawk.