Manchester City chuan Croatia midfielder Mateo Kovacic chu Chelsea atangin Pound maktaduai 25 in an lalut.
Kum 29 mi hian City-ah hian kum li contract a ziak a, a khelhdan a zirin Pound maktaduai 5 pek belh an la ni dawn.
Kovacic hi tun nipui a Man City in player an lakluh hmasak ber a ni a. “Ka tan huntha a inhawng a, City zawm hi thil tha tak a ni. Club tharah hian bul tan hlan ka nghakhlel tawh hle.” tiin a sawi.
City hian free transfer in Ilkay Gundogan chu Barcelona lakah an chan a, hei vang hian midfielder thar an dap.
England midfielder Declan Rice chu Pound maktaduai 90 in dawr mahse Hammers in an hnawl a, dawr chhunzawm an tum tawh lo.
“Tu pawhin Pep hnuaia he team hi an en chuan an thatzia an hre vek, khawvela team tha ber an ni a, football tha an khel. He squad a tel ve hi footballer tu pawhin an duh ang.” a ti bawk.
Kum 2018 khan Real Madrid atangin Chelsea hi a zawm a, season liamta khan club tan vawi 37 a inkhel.