Police-in rawlthar kum 19 mi a kah hlum duh loh lantirna avangin Thawhlehni zan zankhua khan Paris khawpui leh a chhehvelah a buaina a chhuak.
Social media-a video darhah chuan police officer-in car khalhtu rawlthar hi a tin a, a kap zui niin a lang a. Car hian thil suin a ding zui.
Rawlthar hi Naël M ti chauhva a hming sawi a ni a, emergency services-in buaipui zui mah se a awma kahna hliam tuar lovin a thin.
A kaptu officer hi tualthah thubuai siamsak nghal niin hren mek a ni.
He thil hi Thawhlehni zana Paris khawthlang lam hret, Nanterre-a thleng niin mipuiin duh lohna nasa takin an lantir zui a, mi 31 lai man zui an ni tawh.
Naël M hi kumina France rama police-in lirthei khalh lai tihdin an tumna lama an thah pahnihna a ni a. Nikum khan mi 13 thah an ni.
French chanchinbute chuan police hian an car hian tihnat a tum a, hei vang hian an bei let niin an sawi tih an tar lang.
Hetih lai hian video darhah chuan chutiang chu a ni lo thung.
Lirthei pakhatah officer pahnih an chuang a. Pakhat chuan car dang khalhtu hi a tukverh atangin silaiin a tin a, hnai tak atangin a kap tih a lang.
AFP news agency chuan video-a langte hian ‘i lu-ah kah i ni dawn’ tia an sawi ri pawh a lang a; mahse, tu zawk sawi nge tih erawh hriat mai theih a ni lo thung.
Rawlthar an kah hlum tak chuanna car-ah hian mi dang pahnih an chuang ve bawk a, pakhat chu tlan chhiain pakhat, kumtlinglo tho chu man a ni thung.
He thil thleng hian mipui thin a tirimin thu an zawm duh lo va, zankhuain an buai a. Car leh bawlhhlawh bawm an hal a, thil an tichhe nual bawk a. Police station bulah halpuah lam chi an hal khum nasa hle bawk a. Riot police chuan hnawh darh nan mittui tlakna an phuh a, an kal zel tur dan nan pal (barricade) an hung nual bawk.
Asnières, Colombes, Suresnes, Aubervilliers, Clichy-sous-Bois leh Mantes-la-Jolie khuaah te pawh buaina hi a chhuak bawk.