Chief Minister Zoramthanga’n Mizoramin remna a neih vawnhim tlatna chuan hmasawnna ngialnghet leh tha zawk a thlen thei a, hmasawnna hna chak takin a thawhtir theih tih thu nimin khan Remna Ni puala thing tiak an phunnaah a sawi.
Naktuka Remna Ni vawi 37-na lo thleng tur puala nimina MINECO-a Open Gym bula thing tiak phunna hun an hmannaah Zorama chuan kum 1986-a MNF leh sorkar laipuiin remna thuthlung an lo ziah chuan Mizoramah remna leh muanna tluantling a thlen thu sawiin, Mizoramin remna a neih chu remna zawnga remna hlawhtling leh tluantling ber, ram dangte pawhin an inremna thuthlung atana an entawn leh he remna hlawhtling tak hi ram danga a thawn chhuah theih that ber a nih thu a sawi a, Pathianin Mizoram a pek remna chu vawng nung zel turin Mizo mipuite a sawm.
Chief minister chuan remna ni puala thlado tiak phun a ni chu a inhmeh thu a sawi a, khawvel boruak inthlak danglam nasat avanga khuarel chhiatna thleng fo laka him nan environment humhalh a pawimawh hle tih te, Mizoram pawhin theihtawpin hma a la mek tih a sawi a. Ram dang leh state thenawm atanga an sahimna zawnga Mizorama lutte chungchang pawh sawi langin rilru leh taksa damna zawnga rawn kalte chu hmangaihna nena lo tuamhlawm turin kalkhawmte leh Zoram mipuite a chah a a ni.
Remna Ni puala thing tiak phunna hunah hian Chief Secretary Dr. Renu Sharma leh GAD Commissioner & Secretary Lalthawmawia pawhin thu an sawi a. He hunah hian Chief Minister Zorama chuan Remna Ni vawi 37-na pualin balloon 37 a thlawhchhuahtir bawk a ni.