Juventus manager hlui, Italian football legend Andrea Pirlo chu Serie B club Sampdoria in an manager thar atan an lalut.
Kum 44 mi hian Sampdoria hnenah hian kum hnih contract a ziak a. Kum 2020-21 season khan Juventus hi enkawlin Coppa Italia leh Italian Super Cup te a lakpui a, nimahsela Serie A-ah palina an nih avangin club lamin an thlak.
Turkish Super Lig lamah kal lehin Fatih Karagumruk a enkawl a, May thla khan club hi a chhuahsan.
Sampdoria hi tun Serie A season zo ta ah khan an inhamtang thei lova, Serie B-ah an tla thla a ni.
League-ah a hniam ber niin Inter midfielder hlui Dejan Stankovic chuan a chhanhim thei lova, ani hian Marco Giampaolo chu nikum October khan a thlak.
Hei vang hian kum 2011 hnua a vawikhatna atan Italy a league sang ber dawttu ah hian an khel dawn a. Pirlo hovin kaisan lehnghal an inbeisei dawn.
Italian football a hming langsar tak Pirlo hian kum 2017 a football a chawlhsan hnuah kum 2020 khan Juventus Under-23 enkawlin coaching-ah bul a tan.