Mizorama sawrkar hnathawk inzawmkhawm pawl Federation of Mizoram Govt Emplyees & Workers chuan sawrkar hnathawk pension kum 60 ni lai mek chu 62 ah tihsan ni rawh se tiin sawrkarah ngenna an thlen a. Sawrkar chuan heng pawl CYMA, MUP, MHIP, MZP, MSU te rawnin sawihona a buatsaih a. Sawihonaah hian sawrkar aiawh DP&AR tel bawkin, Finance deptt lam in kum tihseiin sum leh pai lama a nghawng tur an hrilhfiah a. Ni 27. 6.2023 khan he sawihona hi neih a ni.
Sawrkar hnathawk lam hian mihring kan lo hrisel chho tawh a. Kum 60 chu hrisel tha pangngaiah chuan hnathawk rual, experience nei tha leh la valai tak mai an ni a. Sawrkar pawhin a chhawr rei hian a hlawk zawk a ni ti an awm a. Finance deptt. chuan sawihonaah hian he kum tih seiin sum leh pai lama a nghawng tur sawifiahin pawhsei anih chuan kumtin budget atangin vaibelchhe 272.94 sen belh a ngaih tur thu an sawi a ni.
CYMA leh MUP chuan hemi chungchangah hian sawrkarin a tih dan dan an pawm thu an sawi a. MZP leh MSU ten tihsan duh lovin a tawp thlenga do an tum thu an sawi thung bawk.
Engpawh nise, kum tihseiah hian India ram state hrang hrang tih dan a inang lo viau a. DP&AR lamin an zirchiannaah chuan India ram state 5 chuan pension kum hi 62 ah an dah a. State 17 in kum 60 in an dah a, state 7 in kum 58 an ti a, state pakhatin kum 56 ah an dah a, state pakhatin kum 61 ah an dah bawk.
Sawihona piah lam mipui ngaihdan tur chu hriat a ni hauh lova. Ngaihtuah chian ngai erawh sum leh pai a nghawng turte, sawrkar hnathawk ngaiin office an luah rei lutuk avanga thalai lo chho zel tan hna hmuh a harsat phah turte hi a ram pum nghawng a ni. Vawilehkhata thutlukna siam mai chi a nih hmel loh khawp mai.
Kumina kan state budget atangin sawrkar hnathawk hlawh hi 36% ruahman a ni a. Sawrkar hnathawk hi kan ram population atangin mi 5 % vel nia chhut a ni a. Mi 5% in budget 36% an chang nghal ringawt pawh hi state economy dinhmun that lohzia leh source kan neih tlem si zia tarlangtu a ni. Kan ram economy chu kan sawrkar hnathawk 5% teah a innghat a tih theih deuh thaw a ni. Chuvangin sawrkar hnathawk tihtlem, pension post hnawhkhah loh deuhte mi tam takin an ngaihtuah tawh lai a, an pension kum lo pawhsei chu thil tih chi vak a nih loh hmel khawp mai.
Tin, sawrkar hnathawkte a ngaia an thut rei lutuk chuan thangthar lo kal chho te tan hna a vang tawlh tawlh a. Zirlai leh naupang zawkte hmakhua an dal a. Hei hian unemployment nasa tak a thlen thei a. Ram changkang ber ber pawhin unemployment hi an buaipui ber a ni. Hetianga hna ti harsa zawnga hma lo lak hi a fuh lo tawp ang tih a rin theih mai awm e.
Kan sawrkar hnathawkte pawh hian kan ram sum leh pai dinhmun hria a, an pension har hretin a nghawng turte, anni chuan sawrkarah hamthatna kum tam tak an chang tawh alawm le tihte ngaihtuah chung hian inhnukhniam thei se a duhawm ngawt mai.