- Ruata
British bike company lar leh hlun, Triumph bike thar – Speed 400 leh Scrambler 400 X thar ber berte chu phochhuah a ni ta a. Heng bike te hi Triumph leh Bajaj thawhhona atanga tihchhuah hmasa ber an ni a, Bajaj company in a siamchhuah hna an thawk ang a, India ramchhungah an siam dawn a ni. Speed 400 hi a styling lamah chuan Speed Twin 900 (Street Twin tia koh thin) zulzuia duan a ni a, Scrambler 400 X design erawh Scrambler 900 aṭanga lak a ni thung a ni.
A khawl
Heng bike thar pahnih hian single-cylinder khawl thar, Triumph in TR-series engine tia an vuah chu an hmang dawn a. Hei hi liquid-cooled a ni a, DOHC architecture neiin 398cc a ni a. He khawl hian 8,000rpm-ah 40hp power a pechhuak thei a, 6,500rpm-ah 37.5Nm torque a pechhuak thei bawk a, 6-speed gearbox an nei a ni. Liquid cooling awm mahse engine hian cooling fin a nei a, hei hi a cheina a ni zawk mah ang a. Triumph bike kan lo hmuh tawh thin design leh khawl bawr landan a pawl viau a ni.
A bike nghahchhan
Triumph bike thar pahnih hi hybrid spine/perimeter frame, tubular steel hmanga siam niin an tarlang a. Bike pahnihah hian engine hi a inang na a, a bik siamphung ve ve mil hian a nghahchhan, a chassis erawh a danglam thung a. 17 inch ke a nei a, a tyre hi a tha mi, Metzeler Sporte M9RR a ni. Hetihlai hian Scrambler hian 19-inch/17-inch alloy wheel te a hnung leh hmaah a nei thung a, Metzeler Karoo Street tyre a hmang bawk a ni.
Bike pahnih hian basic suspension format inang an nei bawk a – 43mm big-piston fork leh monoshock niin Scrambler hian Speed aiin suspension travel a nei tam zawk thung a, a su thui thei bik tihna a ni awm e. Scrambler-ah chuan 150mm travel a ni a, Speed hian hma lamah 140mm leh hnung lamah 130mm travel a ni thung a ni. Brake pawh a danglam deuh hlek a, Speed-a 300mm front disc neiin Scrambler chuan 320mm disc a nei thung a. Hei hi a bike rih hret a vang pawh a ni mai thei, Scrambler hi kg 179 a ni a, Speed-in kg 170 a rit a ni thung a ni. Scrambler hi a seat pawh a sang zawk a, 835mm a sang niin Speed hi 790mm a sang a ni thung a ni.
Hmanraw kentel hrang hrang
Triumph bike hoa kan lo hmuh thin angin heng 400cc bike thar pahnihte hian hmanraw changkang leh tha tak tak an keng tel a. Standard-ah hian all-LED lighting, ride-by-wire, switchable traction control, dual-channel ABS, immobiliser, assist clutch, USB-C charging port leh semi-digital instrumentation te a awm a. Analogue speedometer lian tha tak awmin, a bulah hian LCD screen te tak te dah tel a ni bawk a. Screen-ah hian digital tachometer, gear position indicator, trip data leh fuel gauge te an dah a. Heated grips symbol pawh hmuh tur a awm bawk a, Triumph hian hei hi duhthlan theih accessory angin a dah hmel thung a. Scrambler bikah hian dual-channel ABS hi off-road-a hman dawn chuan a ‘off’ theih a ni. Heng bakah hian kentel tha tak tak a awm a, a changkang dawn viau a ni.
A man tur
India rama Triumph Speed 400 leh Scrambler 400 X official-a tlangzarh hi July 5 hian neih a ni dawn a, hetah hian chiang zawkin tuna kan tarlan loh tam tak kan hriat theih dawn bakah a man tur te pawh puanzar a ni dawn a. A man tur hi beisei dan chuan Rs Nuai 3 (ex-showroom) bawr vel a ni dawn a, Scrambler 400 X hi a to hret beisei a ni.