India hmar lam, Uttar Pradesh-a truck-in state danga hna thawkte chuanna bus a sutnaah 18 an thi.
State danga hna thawkte hi Haryana atanga Bihar-a an khua pan tur niin km 1,300 zeta thui kal tur niin Barabanki district-a bus-a an chuan laiin chhiat an tawk ta a ni.
Bus hi a din lai a ni a, thenkhat chu a chhungah an awm a, thenkhat erawh a bul pawnah an mu chawl a. Nilaini zing khaw var hmain chhiatna hian a nang ta a ni.
Police-te chuan bus-ah hian a chuang thei zat tura bituk aia tam an chuang niin an sawi.
Barabanki Superintendent of Police Yamuna Prasad chuan bus khalhtuin khawl lama fel loh deuhna awm a en fel chhungin a chuang thenkhat hian a chhunga mu lovin pawna mut hahchawlh an thlang niin a sawi.
“A vanduaithlak hle a. Bus-ah hian mi 65 chauh chuan theih a nih laiin mi 140 chuang an chuang a, hei hi a chhiat chhan pawh a ni pakhat a, chhiat tawk chhungte pawh kan puibawm nghal mek a ni,” a ti.
Prasad-a chuan bus-ah hian air-condition khawl a awm avangin tukverh a nei lo niin a sawi a, hei hi a chuang thenkhat pawh pawn lam, kawngpuia mut daih an duh chhan niin a sawi.
Mi 30 velin hliam an tuar a, an zinga thenkhat phei chu an na hle a, Barabanki-a damdawi inah dah an ni.
Prime Minister Narendra Modi chuan chhiat tawkte a tawrhpui thu sawiin an chhungte hnenah zangnadawmna Rs. 2,00,000 theuh pek an nih tur thu a puang nghal a. Hliam tuarte pawh Rs. 50,000 theuhva an kan tur thu a puang bawk.
Bihar-a chengte hi an state pawn lamah hna thawka chhuah an ching hle a, a bikin Haryana leh Delhi velah an chhuak nasa zual thin.
India ramah hian state pawn lama hna thawka chhuakte hian veivah nan a chuan man a tlawm avangin rel leh bus an hmang nasa hle.