Luangmualin rin hlawh zawk ni chungin Tata SK 712 Pro Volleyball League final an khel dawn a, Kananin an tlawm tawhna chhang let turin tha zawka inlan theih an inringtawk.
June 22 khan khelh li ve ve chak zawn chungin league khar nan an intawng a, set khatna an hloh hnuah Luangmualin awlsam takin set thum an la zawn a, Nipa Barad chuan point 38 hlawh chhuakin inkhel vawi khata an hmuh tam ber a ni.
Pro Volleyball-a an tel hmasak berah Luangmualin final an lut mai ni lovin vawi ruk an khelh tawhah chiang takin an bitum an hneh vek. Hmeichhe team paruk inel zingah state pawn atanga player la lut awm chhun an ni a, Gujarat tleirawl Nipa chuan point 166 vaw chhuakin 78 a hloh a, an chakna hnar pawimawh ber a ni.
2019 Pro Volleyball player tha ber Lalmuanpuii’n Nipa-i point hmuh chanve tluk lo deuh hlekin 81 a thawk chhuak a, tum 33 paih ve thungin anni pahnih bakah Hmingthazuali leh R Malsawmtluangi’n point 43 leh 32 thawh bawkin derthawng lovin Luangmual an chak zel.
Tun season-a che tha Kananin thawh hona leh insawrbingna thuk zawk nen kum 18 mi Nipa leh Luangmual dan theih an inbeisei ve thung a. Ningani zanah R Dengthuama Indoor Stadium, Mualpuiah a vawi khat nan an champion a nih chuan trophy pathum nen ropui takin kum an khar dawn.
Coach Eric Lalsangliana Pautu chuan Luangmual an hneh loh hnuah kir leh tumin an inpuahchah ngawrh hle tih a sawi a, mi mala innghahna tur bik nei lo mah se team pum puiin hmasawnna an lantir theih nan ruahmanna awmze nei nen khelmualah an lut dawn.
“Kan hneh lo viau a, kan zawn khelh chhoh deuh avangin kan chau deuh pawh a ni maithei. Nipa dan theih a pawimawh a, a vuak dang turin player pakhat mai ni lovin pahnih tal net bula kan zuan taimak a ngai.
“Hlap theihna hun tha a hmuh fo loh nan lak harsa turin service kan zir ngawrh a, a nawrtu zawk nih kan tum a ni. A hma aia tha zawka kan inlan ngei ka ring a, mi tantu mipui thahnem tak hmaah phurna sang zawk nen kan khel thei ngei ang,” a ti.
Luangmual laka an tlawmna kha season kal meka an inkhelh tawhah Kanan chak loh awm chhun a ni.
Pro Volleyball bika vawi ruk an khelh tawh atangin R Laltleipuii’n point 67 hmuin 24 a hloh a, thawh hlawk ber ni mah se Lalramliani’n point 59, Lalbiakngheti’n 49, Lalhriatpuii’n 46 leh B Tlangmawii Varte chuan 35 an hlawh chhuak tawh bawk.