Tunhnai chho atang khan concert ticket man nasa takin a to a. Zaithiam Beyonce leh Taylor Swift te’n an tito lehzual emaw tih mai turin ram economy nghawng phakah ngaiin, economoist ho an hawi buai.
Fan te lah hian an neih zawng zawng pawh pek huam ni awm fahranin, ticket manto ah an buai lo mai ni lovin, en ngei tumin an rilru an siam sauh sauh zel mai chu a ni si a, hengte vang hian ramchhunga inflation-ah nghawng na tak nei chhovin, tunhmaa concert ticket enliam leh sawi liam mai mai thin chu tunah chuan nitin khawsak phung leh nundan phung thlenga nghawng nei phaa ngaih a ni ta reng mai.
Beyonce fan ruhkawl pakhat Mario Ihieme chuan, “Mite hian an mit leh beng tlaina tur an hmu ngei dawn tih an hriat vangin sum sem an huam em em a, engtikah nge an lo kal leh dawn tih hriat a ni bawk si lova, ticket manto tih velin a tibuai lo,” a ti.
Zaithiam an ngaihsan leh ngaihthlut em em te zai leh lam lai, live ngeia hmuh theih chu an duhthusam a nih vangin ticket to uchuak deuh pawh ni se, an inhuam viau zel.
Heti anga sum nasa tak sen a nih vang hian a bik takin UK angah chuan thil man a tochak nghal em em zel mai a ni.
Beyonce khan Sweden ramah thil man a tihto phah vek em?
Tun thlatir lam khan Sweden rama inflation nasa lutuk chu Beyonce thawhrah liau liaua puhna a ri ring hle a, mimal taka mawhphurtu a ngaih a ni. Sweden-a concert a neih khan hotel leh restaurant a awl/ruak hman lova, demand a sang thur thur ta mai si a, chu chuan an ram economic statics a sawi danglam dawrh!
COVID-19 nghawng a tawp a, music concert vul thar thut em?
Hripui leng nasa tak vanga kum hnih dawn khawvel a inkharkhip hnu khan fan te chuan live music ngei tawn a, chhim leh ngei tumin an phu suau suau nghal a.
Music industry tan chanchin lawmawm tak niin, ticket sale a pung chak hle a, khawvelpum huap anga inkharkhipna hlih a nih meuh chuan a hu hova awmkhawm dual dual a, concert-na hmuna zai a, lam dual dual te a lo nuam thar leh ta a, live ngei maia zaithiam an tih em em leh duh em emte an hmu thei ta chu an tan sum leh pai sen deuh pawh pawi tih lohna leh enliam mai theihna thlarauin a pawl ta a ni ber.