Arsenal chuan Germany forward Kai Havertz chu Chelsea atangin Pound maktaduai 65 in an lalut.
Kum 24 mi hian Gunners hnenah hian kum nga daih contract a ziak a. Stamford Bridge-ah lum thum a hman hnuah London club dang a zawm.
Havertz-a man hi club pahnih inrem danah hian a khelh tam dan a zirin la pung thei a ni.
German international hian Bayer Leverkusen atanga Pound maktaduai 71 a Chelsea a pan hnuah an tan vawi 139 a khel a. Goal 32 khungin midang khung tur vawi 15 a siamsak.
Chelsea ah hian beiseina sang tak nen lut mahse a chetthat aiin sel a hlawh chang a tam thin a. Nimahsela kum 2021 UEFA Champions League final a an chakna goal khungtu a ni.
Mikel Arteta chuan tun season lo awm tura UEFA Champions League khel tura a team a buatsaihna kawngah a squad tichak turin lakluh a duh a, indawrna pawh rei tak kalpui lovin an tifel nghal thuai.
Havertz hian Chelsea tantute zawng zawng thlahna thu sawiin chhuah chu thil awlsam a ni lo tih a sawi a. “In mi thlawpna zawng zawngah lawmthu ka sawi a. Kan duhthusam Champions League chu kan tihlawhtling tlang a ni.” a ti a. Arsenal-ah hian trophy tam zawk chawi tum a lut a nih thu a sawi tel bawk.