Aizawl: Chief Minister Zoramthanga hovin Tourism Minister Robert Romawia Royte leh sorkar hotu dangten nimin tuk khan Zuangtuia Supply Department kudam tlawhin Unity Mall sakna atana a remchan theih dan tur an thlithlai.
Sorkar thuchhuahin a tar lan danin Unity Mall chungchang hi kumin February thla khan union budget session-ah union finance minister chuan sawiin tourism leh mahni kutkawiha eizawngte hmasawnna tur atan leh inpumkhatna atan state tinte an capital-ah din tum tura tih an nih thu a lo sawi tawh a ni.
Unity Mall hi state tinte an state nihna leh ziarang pho chhuak tha thei ber tur thil siam chhuah/thar chhuah te, GI product-te leh handicraft thilte chawilar nana tih niin, mall tinah hian mahni state mai bakah ram chhung state dangte thil siam chhuah theuh pawh pho lan ve tur a ni a. Sorkar laipui chuan a sakna tur Rs vaibelchhe 120 chuang a dah a ni.
Nimin zinga sorkar hotuten an tlawh, Zuangtuia Supply kudam hi Sairang Dinthar venga sawn tur a ni a, kudam thar hi sak zawh a nih hunah Zuangtuia Supply kudam hi mipui tana tangkai thei ang bera hman tum a ni.