North Korea chuan an ram hruaitu, Kim Jong-un-a lan cherna deuh video an tichhuak a, hei hian an ramah chuan sawi a hlawhin a hriselna dinhmun tha tawk lo anga an lo sawi fo hi a tak a ni em tih zawhna a pian phah.
Supreme Leader hriselna hi an sorkar chanchinbute hian an tar chhuak ngai lo hle a, tuna a danglam ta hian mak tih a hlawh.
An rama television channel lian bera video tihchhuah tharah Kim-a hi tun hma lam zawng aiin a cher.
Thuneihna a chan tirh atang tawh khan North Korean hruaitu hriselna hi sawi a lo awm fo tawh thin a; mahse, an ram sorkar, thil reng reng thup ching hian a puang chhuak ngai lem lo.
Korea Central Television-in tuna a lanna a tihchhuah pahnih erawh chuan an Supreme Leader dinhmun zawhna a titap a. Clip pakhatah chuan concert-na hmuna a kal tur niin ni dang zawng aiin a zân hmel hle.
Pyongyang-a cheng mi pakhat chuan Central TV hnenah hian, “Khatiang hmel a pu khan min tilungngai hle a. A hmutute phei chu an tap a ni,” a ti.
Tun thla tir lama Workers Party meeting-a thlalak leh video velah pawh Kim-a hian a rihna a hloh nual niin a lang bawk.
NK News website-a lo bihchiangtu pakhat chuan a sana man to bun thin chu a hma zawng aiin a titawt zawk niin a sawi a, hei hian a rihna a tihniam niin a lang tih a sawi.
An hotupa ber chanchin tha lo lam hi sorkarin a sawi duh ngai loh avangin tuna rihna hloh nasat hmel taka a lang pawh hi a hrisel lohna lam vang ni lovin ama duh thu vanga inticher niin mi thenkhat chuan an ngai.
North Korea lam chanchin hria, One Korea Center-a an hotu, Kwak Gil Seob chuan BBC hnenah, “Pyongyang hian Kim Jong-un-a chanchin lawmawm loh lam hi an tichhuak ngai lo va, hei vang hian a lan dana tha lo anga ngaih theih pawh hi ama duhthlana cher a ni ang, tha lo tak tak ni se an tilang lo vang,” a ti.
Kim-a hi December, 2011-a a pa, Kim Jong-il a thih atang khan North Korea hruaitu a ni tan a. Hemi hnuah hian a rihna hi a pung chak hle niin a lang a, hetih rual hian a hriselna pawh hi a tha tawk lo hle niin an sawi thin bawk.