Mamit District Wrestling Association hawnna leh lawmna hun chu Ningani khan Siamliana Hall, Mamitah neih a ni a. He hun hi Mizoram Wrestling Association President Ngurthangsanga bakah executive Committee ten an hmanpui.
MWA President chuan, “Infiamna leh zirna a kal kawp tur a ni, chak leh huaisen mai a tawk tawh lovà, lehkha kan thiam tel a ngai.” a ti a. “Wrestling hi India in Olympic a medal lak tamna ber a nih avangin Mizo naupangte pawhin Olympic ah medal kan la thei. Sports hi eizawnna tlak a ni tawh a, tih takzeta kan beih chuan hlawhtlinna tam tak a awm a ni.” a ti.
Thalaiten tunlaiah ruihhlo avangin harsatna an tawk nasa a, hei vang hian wrestler-te chu fihlim turin a chah a. Lal Isua nena infiamna kalpui chuan malsawmna a awm ang tiin a sawi bawk.
MWA President hian Mamit District Wrestling Association din tanni atan MWA a affiliation fee an pek ni May 12, 2023 chu a puang a, Mamit District Wrestling Association chu a hawng nghal a ni.
Mamit District Wrestling Association hnuaiah hian Wrestling Club pathum- Chalchungnunga Wrestling Club, F. Tlangsiama Wrestling Club leh Lalkulha Wrestling Club te an awm.