India-a eptu, Congress party hruaitu hlun, Rahul Gandhi chuan tun hnaia tharum thawhna thlen nasatna, Manipur chu Ningani khan a tlawh a; mahse, police-in lirtheia a tlawh tum pakhat a pan laiin an dang.
Gandhi-a hi hmarchhak state-ah hian ni hnih a cham dawn a, buaina chhuak avanga mipui tlanchhiate leh mipui aiawh pawl hrang hrangte a kawm ang.
Thla hnih liam ta chhung khan Manipur-ah hian a cheng hnam hnih, mi tam ber Meitei leh Kuki inkarah buaina chhuakin tharum thawhna a thleng nasa hle.
Mi 100 chuang an thi tawh a, mi 400 chuangin hliam an tuar tawh bawk.
Prime Minister Narendra Modi chuan Manipur-a thil thleng chungchangah hian sorkar hotu pawimawhte chu kawmin thutkhawmpui mah se a la tlawh miah loh avangin sawisel a hlawh hle a. Buaina chhuakah tawngka a la neih miah loh avangin dem a hlawh hle bawk.
Buaina a chhuah tan atanga thla khat dawn hnuah Home Minister Amit Shah chuan tlawhin muanna a awm leh theih nana ruahmanna hrang hrang a siampui a; mahse, tun thlengin ni tin deuhthaw tharum thawhna a la thleng reng.
Ningani tuka Imphal a thlenhnuah Gandhi-a chuan Facebook-ah ‘muanna a awm leh chu a ngaih pawimawh ber a ni a. Manipur chuan damna a mamawh a, tanrual chauhvin inremna a awm thei’ tih a tar lang.
He thu a tar lan hnu lawkah hian Congress hruaitu hlun, KC Venugopal chuan thuthar lakhawmtute hnenah, Gandhi-a leh a thuihhruaite hi Churachandpur-a relief camp tlawh tura an kal chu police-in Bishnupur district-ah an dang tih a sawi.
“Police chuan kaltlangtir theihna an nei lo tih an sawi a. Kawngpui sirah Rahul Gandhi-a lo autu tam tak an intlar a. Engvanga lo tiding nge an nih kan hre thiam thei lo a ni?” tiin Venugopal chuan a sawi.
Police chuan Gandhi-a himna tur ngaihtuahin an dintir tih an sawi a. “Thil awm dan kan hmu a, a kal zel tur kan lo dang ta a, Churachandpur chu helicopter-a pan zawk mai turin kan lo ti a ni,” tiin Bishnupur-a police hotu lian, Heisnam Balram Singh chuan ANI hnenah a sawi.
Congress hruaitute erawh chuan he thil thleng hi an sawi zui nasa hle.
Party President Mallikarjun Kharge chuan BJP sorkarin Gandhi-a che vel tur chu ‘thuneihna khawng tak hmangin an lo dang’ niin a sawi.
“Hetiang hi chu pawm theih a ni lo va, danpui leh mipui rorelna kalhmang a ni lo. Manipur hian muanna a mamawh a, inepna ni lovin,” tiin Twitter-ah a tar lang.
Congress MP Jairam Ramesh chuan Gandhi-a’n ni hnih chhung hmarchhak state a tlawh tur hi thla nga chhung awh inpumkhatna kawng zawh, Bharat Jodo Yatra kal zela pakhat a nih thu a sawi.
“Prime minister hian ngawih emaw, chet chhuah miah loh emaw a thlang a, hetih lai hian eng vangin nge Manipuri pawl leh hnam hrang hrangte damna tura Rahul Gandhi che chhuak chu dan a nih?” a ti.
BJP hruaitu thenkhat pawhin Gandhi-a’n Manipur a tlawh hun chu an lo sawisel ve mek bawk a, politics thil mai mai a nih thu an sawi.
Manipur-a tharum thawhna thleng avang hian an in leh lova awm thei rih lo mi 60,000 dawn awmin camp 350 chuangah an khawsa.
Gandhi-a’n a tlawh mek lai hian eptute chuan Manipur BJP Chief Minister N Biren Singh chu muanna a awm theihna tura hlawhchhamah puhin bâng turin an ti ve mek bawk.
Congress hruaitute chuan Singh-a hi an state-a ‘muanna leh nunphung pangngai’ a awmtir theih loh avangin an dem a, sorkar laipui thuhnuaia dah mai an rawt bawk.
Venugopal-a hian Thawhlehni khan Gandhi-a’n Manipur a tlawh tur thu hi Twitter-ah a lo tar lang tawh a. He state hi ‘thla hnih dawn a kâng tawh’ tih tar langin, ‘damna kut an mamawh a, an khawtlang hian buaina atanga muanna lam pan turin damna an mamawh’ tih a tar lang bawk.
May thla tira buaina a chhuah atang khan mipui thinrimin chenna in, biak in leh temple tam tak an tichhe tawh a. State minister leh MLA inte pawh beih niin hal pawh a awm bawk.
Tharum thawhna thleng zel tur veng tur hian venhim hna thawktu mi 40,000 dawn dah an ni mek.
Heti chung hian boruak a la tang em em reng a. Curfew puan a ni a, internet tihthih niin inthahna leh thil inhalsak a awm reng avangin vantlang tan chuan nunphung pangngai a hla rih hle a ni.