Aizawl : MNF thalai President, MLA Dr. L. Thangmawia’n Mizoram tâna din political party tam tak an lo awm tawh tih sawiin, “Mizo hnam tân din awmchhun erawh MNF party chauh a ni” a ti.
Kolasib Block MNF thalai conference nimina neih a hmanpuinaah he thu hi MNF thalai President chuan a sawi a. India rama political party tam takin kum 60 pawh an tlin theih loh laia MNF-in kum 60 an tlin bik chhan chu Pathian hruaina vang a nih thu leh chapona tur a awm loh thu a sawi. “MNF-ah mi fel lo tam tak pawh kan awm ang, mi tha tak tak pawh kan awm ang. Kan tling lo chung chungin Pathianin min kaihruai a, vawiin min hruai thleng a ni”, a ti.
Pathianin MNF chu hruaitu ropui tak tak a pe nia sawiin, party dang aṭanga hruaitu lawk apiang la lut thei hruaitu ni thei an van thu a sawi a. “Mizorama kan politician tam zawk hian hemi kawngah hian Pu Zoramthanga hi an hre chiang a, an hriatchian avànga party hran aṭanga rawn lûta amah rawn zui thei an ni”, a ti bawk.
He hun hmanpuitu dang, bialtu MLA, Minister ni bawk K Lalrinliana pawhin MNF party zawm tura thutlûkna a siam chhan ber chu ram tâna theihtawp chhuaha nunna hlan huam te an nih vang niin a sawi a. “Kan ram tana beitu leh nunna hlantu ten ram tâna an lo beih tawhna zawng zawng kha keini ho hian a thlawnin kan luan raltir tur a ni lova, ‘Pathian leh kan ram tan’ titu kan nih hi kan ngaihpawimawh a ngai” a ti bawk a ni.