Aizawl: Mizoram Mobile Drug Dealer Association chuan nimin khan Manipur raltlan, Keifang Relief Camp-a awmte pualin a thlawna inentirna, free clinic, Keifang Primary School-ah an buatsaih.
Free clinic-ah hian Dr. Mampy Lalparmawii (Child Specialist), Dr. Saidingliani (Dental Surgeon) leh Dr. C.Zothanpari (Gen.) ten raltlante hriselna dinhmun an enfiah a, anni bakah hian medical missionary pahnih, Dr. Abigail Dennis, (Lifestyle coach) leh Dr. Esther Gadhala (Lifestyle coach)-te chuan a mamawhte tan trauma counselling leh therapy an pe tel bawk a. Doctor puibawmtute leh MMDDA member-te nen mi 22 free clinic-ah hian an thawk chhuak a ni.
Keifang Joint VC area-a Manipur sahimna zawngte tana relief camp buatsaih, Keifang Venglai Hall leh Govt. Primary School I building-ah hian mi 63 leh mi inluaha khawsa mi 250 vel an awm mek a, hengte hriselna hi endik niin, damdawi a thlawna sem niin, ni tin mamawh buhfai, dal, alu leh tel eng emawzat an pe tel bawk.
Mizoram Mobile Drug Dealer Association hi kum 2014-a din niin Seventhday Adventist Hospital-te nen thawkhovin free clinic hi an nei a. Mobile license nei zing atangin MMDDA-ah hian member 18 an awm mek a. Tun tum Manipur raltlan puala damdawi chi hrang hrang an ken hlut zawng hi Rs. Nuai 5 vel nia chhut a ni.