India rama state mala hri leng tuar na ber, Maharashtra state khawpui, Mumbai-a naupang kum 18 hnuai lam tana sero survey neihah 51% laiin Covid dotu an nei niin a lang.
He khawpuia an zirchian hun inkar hi April 1 leh June 15 inkar kha a ni.
Sero prevalance hi Covid-19 siamtu virus SARS-CoV-2 dodal theihna tih a ni.
Laboratory hrang hranga thisen sample 2,176 lai an lakkhawmah sero prevalance nei tha berte chu kum 10 leh 14 inkar niin 53.43% an ni a, kum 15 leh 18 inkar 51.39% an ni a, kum khat leh kum li inkarte chu 51.04% a ni bawk.
A pum puia chhut rualin naupang kum 18 hnuai lam 51.18%-in sero prevalence an nei a ni.
March thlaa sero survey an neih nena khaikhinin SARS-CoV-2 virus dotu, sero positivity naupangah a pung tih hmuh chhuah thar a nih thu Brihanmumbai Minicipal Corporation (BMC) chuan a tar lang a. Hemi tum hian kum 18 hnuai lam 39.4% chauh an ni.
Sero survey hi Mumbai-a naupang zingah neih a nih chhan hi hripui leng thawh thumna thleng palh thei karah naupangin an tuar nasa zual dawn tih thawm a awm vang niin BMC hotute hian an sawi.