Arsenal leh West Ham te chuan England midfielder Declan Rice insawnna turin Pound maktaduai 105 in inremna an nei.
Club pahnihte hian sum inpek dan tur tifelin inbiakna erawh an la nei chhunzawm zel.
Gunners hian a tum thumna atan Rice lei hi an dil a, an dilna hmasa pahnihten West Ham in Pound maktaduai 100 an beisei chu an tlin loh avangin hnawl an ni.
Thawhlehni khan Manchester City in Rice lei tum hian Pound maktaduai 90 in Hammers hi dawl ve mahse hnawl a nih hnuah anni pawh an inrawlh zui tawh lo.
Hammers captain hi kum 2014 a Chelsea atanga West Ham academy a a insawn hnuah club-ah a la awm char char a, tun thla khan Europa Conference League-ah hlawhtlinpuiin kum 43 chhunga an trophy hmasa ber West Ham a lakpui.
Nakkum nipui a contract hmang zo tur Rice hi Manchester City in midfielder Jack Grealish lakluhna tura an sen zat nen a man hi a inang chiah dawn a. Real Madrid in England midfielder Jude Bellingham an leina an pek tlak vek a Pound maktaduai 115 ni thei chiah chu an pha lo.
Premier League a player manto ber erawh Chelsea a khel Argentina midfielder Enzo Fernandez niin Pound maktaduai 107 man a ni mek.
Rice hian West Ham tan hian match 245 khel tawhin goal 15 a khung tawh a. England tan vawi 43 inkhel tawhin Gunners in tun nipui a player pathum an umzui zing ami a ni a. Kai Havertz-a’n club zawm tawhin Ajax defender Jurrien Timber lalut thuai tura ngaih an ni bawk.