Aizawl: NABARD sum Rs nuai 266.5 senga sak Ngentiang Primary Health Centre building thar chu nimin khan Health Minister Dr R Lalthangliana’n a hawng.
Ngetiang PHC building thar hi February 2021-a sak tan niin chhawng hniha sang a ni a. June 6 khan sak hna hi zawh fel a ni a. Building-ah hian hmeichhia leh mipa ward, clinic, dressing room, X-ray room, store room, preparation room, laboratory, waiting area, minor OT, casualty, office, choka te a awm.
Ngentiang Community Hall-a hawnna inkhawmah Dr R Lalthangliana chuan kum hnih leh thla thum chuang Covid hripui avangin sum tak tak sorkarin a hmang ral a. Hripui vang hian health department bikah pawh hna lak tura tihfel tawh tam tak an la thei rih lo a. Chuti chung chuan Mizoram hian Sub Centre 375 a nei a, Primary Health Centre 61 neiin, Community Health Centre pakua a neih bakah Sub Centre zawng zawng te hi Health and Wellness Centre-ah hlangkai hman vek a ni chu a ropuiin a chhinchhiah tlak hle tih a sawi a. Ngentiang Primary Health Centre sak thar pawh hi Ngentiang leh a chhehvel mipuiten tangkai taka in lo hman a beisei thu a sawi bawk.
Health Services (M) Joint Director Dr. Chawngthanchhunga kaihhruai inkhawmah hian bialtu MLA, Er. Lalrinawma, Social Welfare Minister pawhin thu a sawi bawk.