Aizawl: Tlabung chhehvel Khawthlangtuipui mawng lama dan lova khaw din thenkhat chu Tlabung SDO (C) H Zonunmawia kaihhruaina hnuaiah Khawthlangtuipui Group YMA hruaituten nimin khan a thawh hnihna atan tlawhin an dinhmun an enfiah.
Sorkar aiawh leh tlawmngai pawl aiawhte chuan Malsury leh Hmundo Village Council hnuaia dan lova khaw dinte tlawhin an dinhmun enfiaha an zirchian bakah anmahni enkawltu village council thuthmuna an let leh theih nan ruahmanna an siampui nghal a ni.
Khawthlangtuipui Group YMA hruaitute chuan tun thlengin an huam chhungah dan lova khaw din 13 bawr vel a la awm nia sawiin, dan lova khaw din thenkhata awmte chuan sorkar leh tlawmngai pawl hmalakna zawmin an awmna an lo rauhsan tawh niin an sawi.
Dan lova khaw dinah sorkarin hma an sawn theihna tura hmalakna hrang hrang tihtawp a nih dawn avangin tuna an awmna rauhsana an khaw pangngaia let leh chu an tan a tha ber tih an tlawh khuaa chengte hi an hrilh a ni.
Kumin June 13-a Lunglei Additional DC-hova an rel dan chuan kumin July 15 ral hma ngeiin heng khaw hrang hrang dan lova dinte dinhmun zirchianna hi District Level Screening Committee-ah thehluh tur a ni.