India-a eptu hruaitu, Rahul Gandhi-a hian Manipur-a buaina chhuaka a tuartute chu a tlawh a, a kawm hlawm.
Zirtawpni khan Congress hruaitu hian Moirang khuaa relief camp-a awm mekte tlawhin chhungkaw eng emaw zat a kawm niin an party chuan an sawi.
Gandhi-a hian ni hnih chamin hmarchhak state hi a tlawh a, Ningani khan Churachandpur district-a relief camp pawh a tlawh tawh bawk.
Lirtheia a kal chu ama tan a him lo thei nia ngaiin police-in an dang a, helicopter-in a kal zui.
Manipur-ah hian thla hnih liam ta chhungin mi cheng tam ber, Meitei leh Kuki inkarah tharum thawhna nasa tak a chhuak.
Mi 100 chuang thiin mi 400 chuangin hliam an tuar tawh a. Mi sang telin an in leh lo tlanchhiatsanin hmun hi an pan bawk.
Buaina hi he state-a mi cheng zinga a tam ber, Meitei-ten tribal status neih an phutna atanga intan a ni a, he status hi an nei a nih chuan ramngaw, sorkar hna leh zirnaah an hnam tana hauh chin an nei thei dawn a ni.
Prime Minister Modi-a chuan buaina chhuak chungchangah hian sorkar hotute biain muanna a awm leh theih dan tur a sawipui tawh a; mahse, a la tlawh lo leh mipui thlamuanna tur thu engmah a la sawi loh avangin dem a hlawh hle.
Buaina a chhuah tan atanga thla khat dawn hnuah Home Minister Amit Shah chuan tlawh chauhvin muanna a awm leh theih nan ruahmanna a siampui a; mahse, tun thlengin tharum thawhna a la thleng reng tho.
Imphal khawpuia Ningani tuka a thlen hnu lawkah Gandhi-a hian Facebook-ah, “Muanna a awm leh theih dan tur chu a pawimawh ber a. Manipur hian damna a mamawh a, kan tanhovin chu chu a thleng thei a ni,” a ti.
A hnu lawkah Congress hruaitu hlun, KC Venugopal chuan thuthar lakhawmtute hnenah Churachandpur-a relief camp tlawh tura Gandhi-a a kal chu police-in Bishnupur district bulah an lo dah tih a sawi a ni.