Kawlkulh Sub-Headquarters MZP-in nimin khan HSLC leh HSSLC exam-a a titha te chawimawina hun Kawlkulhah an buatsaih a, bialtu MLA Dr. L.Thangmawia’n a hmanpui.
L Thangmawia chuan Kawlkulh khua atanga HSLC leh HSSLC tha taka pass thar te lawmpuiin, MZP-in an puala hun a buatsaih chu fakawm a tih thu a sawi a. “Covid hun thim Mizoramin kan paltlang lai pawhin zirna hi a chawl ve lova, a theih ang angin online leh offline mode tea zirna kalpui a ni a, India ram board tam tak zingah MBSE chu Covid laia board exam kalpui thei awmchhun an ni a, board dangin an rawn zirchiang hial a ni” Thangmawia chan a ti.
Covid len lai pawha board exam kalpui theih chu zirtirtute leh education department-a thawktute thawh- rimna a nih thu sawiin, L Thangmawia chuan “Zoram mipuite ten hriat nawn fo tlak a ni” a ti a. Zirlaite chu tum mumal nei tura fuihin “Tum mumal nei lo zirlaite chu goal awm lova football khel ang an ni a, hlawhtlin a harsa fo thin” a ti.
L Thangmawia chuan “mahni chak zawng leh tui zawng dam chhunga kan thawh theih nan tum mumal kan neih a ngai a, kan tum tihlawhtling turin Pathian rawn chunga nasa taka kan thawh a ngai a, zirlai ten in hun kal zel turah khawtlang tan leh Mizo hnam tana chhenfakawm ni thei tura taima taka in zir chhunzawm zel ka duh takzet a ni” a ti bawk.