Rimawi khawvela hlawhtlinna namen lo an tawngbaw chho zel chu phurrit namen lo anga ngaihna an neih ṭhin thu Jungkook-a’n a sawi. Kum 10 an tlin champha erawh tunhnai khan an lawm.
Hman deuh khan Weverse Magazine nena inkawmnaah kum 25 mi BTS member chuan chart hrang hranga ‘ber’ an ni reng mai leh record-breaking an siam deuh reng chu band tan pressure namai lo tak a nih thu te bakah a aia ṭha zawk siam duhna leh neih duhna rilru put reng mai chu zawh loh nghawngkawl bahna ang lek leka ngaih chang an ngah, a ti bawk.
“Engtik lai mai pawha ṭan mar pât a ngai reng a, kan hla hnuhnung ber aia ṭha leh hit zawk ngaihtuah chhunzawm zel a ngai te a, chu chu mimal tak pawha ka feel dan dik tak a ni.
Delh rittu na lua
“BTS hi team danglam leh duhawm tak an nih rualin, keimah zawk hian ka tlin loh mai hlauhthawnna te ka nei lo thei lova, khawvel hriat kan hlawh nasat poh leh min delhtu pressure a na ting mai a ni,” tiin vocalist JungKook hian an thil tawn sawichhuahna a nei.
BTS english hla pahnihna, ‘Butter’ kha nikum hmasa May thla khan tihchhuah niin, chawlhkar sarih chhung zet Billboard Hot 100-ah No. 1 niin, hemi hnu lawk hian an hla thar, ‘Permission to Dance’ hmangin an phih thla leh a, an mahni record siam tawhsa ngei pawh an mahni vékin hla thar an neih veleh an thaichhe lehnghal zung zung ṭhin.
JungKook vék hian, “Dynamite hla atanga record kan siam chho kha thil ṭha leh lawmawm tak a nih rualin, kan tan chuan phurrit insiamna a ni deuh mai,” a ti a ni.