Indian police chuan Twitter lakah thubuai dang pahnih an ziah belh leh a, social media platform leh sorkar laipui inkara khi lian tak awm chu a punlun zel.
A hmain he company lakah hian police chuan thubuai pahnih an lo ziak lut tawh bawk.
Delhi police chuan National Commission for Protection of Child Rights-in Twitter laka thubuai thehluta naupangte mipat hmeichhiat thil (child pornography) an tilar niin an puh.
Twitter leh Indian sorkar hi sorkarin sawi hlawh tak IT rules thar a siam atangin an inep na hle.
Thubuai pakhat zawk hi Madhya Pradesh-a ziah luh a ni a, hei hi India map dik lo tar lan a nih vang a ni a. Twitter-a map tar lanah hian Jammu & Kashmir leh Ladakh chu India map-ah tihlan a ni ve lo.
Thubuaite hi Twitter India chief Manish Maheshwari laka ziah luh a ni a, ani hi map chungchang avang hian Uttar Pradesh-ah pawh chhui lai mek a ni.
Kashmir hi ram buai reng a ni a, India leh Pakistan ramten an ram ve vea an chhal ni mah se tlem te ve ve chauh an chang thung.
Twitter chuan heng thubuai pahnih ziah luh thar chungchangah hian engmah sawi an la nei lo.
Maheshwari-a lakah hian June thla tir khan Uttar Pradesh-a Muslim pa pakhat sawisak lak video thehdarh chungchangah thubuai siam a ni bawk a. Police chuan he thil thlengah hian sakhaw thil inrawlhna a awm lo tih an sawi a, chanchinbumi leh politician thenkhat bakah Twitter leh news website Wire chu video thehdarha thil kal vel tikawitu tia puh an ni.
Maheshwari-a hi police-ten thu zawh an duh hle a. Court chuan man theih rih loh turin a ti thung.
Thla khat pawh tling lo chhunga Twitter laka thubuai pali chhui ngai awm hian social platform lian tak leh Indian sorkar inkar a tikhi nasa a, sorkar dan thar lo awm nen, an inkar a chhe hle.