Manchester United goalkeeper David de Gea chu nizan khan Old Trafford a contract a neih hmang zo tur a ni a, a hmalam hunah thutlukna siam a la nih loh avangin free agent a ni dawn.
Club leh player-te hian contract pawhseina chungchangah hun engemaw chen chhung indawr in inremna an nei tawh a, nimahsela United lamin tunhnaiah an indawrna an tidanglam leh a, hei hi player lamin an la pawm lo niin an sawi.
Indawrna tihdanglam a nih avangin club leh player-te hian thutlukna mumal an la siam lo.
Kum 32 mi Spain goalkeeper hian United-ah hian kum 12 a awm chhungin an tan vawi 545 a inkhel tawh a. United nen hian inbiakna la nei reng tho mahse inremna thar a la awm lova, club lamin a hma a an inrem tawhna aia hniam zawk hlawh tir an la tum nia sawi a awm bawk.
Man United player of the year tum li ni tawh hi tun season liamta khan Premier League Golden Glove dawngtu a ni a, manager Erik ten Hag leh amah De Gea pawhin club a cham chhunzawm chungchang hi an lo sawi tawh.
Hetihlai hian tunlai football khelhdanah goalkeeper ball pet thiam chu team-ten an duh tawh a, hei vang hian United in goalkeeper rinrawl a neih atan an ngam tawh lo niin thu a thang bawk.
United hi De Gea hma hun a chian loh leh tak hnuah hian Inter Milan atang Cameroon goalkeeper Andre Onana lakluh tum anga sawi an ni nasa hle a. Ani bakah hian FC Porto goalkeeper Diogo Costa pawh sawi tel a ni. Red Devils hian tun nipuiah sum an hman tam theih dawn lo avangin goalkeeper thar lakluh aiin De Gea hi an chelh zel thei tho niin an sawi tel.