Manipur Chief Minister N Biren Singh chu a kaihhruai state-a thla hnih dawn chi leh chi inkara buaina chhuak mek zel a hmeh mih hleihtheih loh avangin Zirtawpni khan bân a tum a; mahse, mipuiin an phal loh nasat em avangin a bâng ta lo niin a minister pakhatin a sawi.
Singh-a hi a chenna in atangin governor chenna pan tumin a chhuak a; mahse, Imphal-a a in tualah hian mi tam tak pungkhawmin an lo dang niin minister hian a sawi.
Singh-a in kawtah hian hmeichhe tam tak an pungkhawm a, an inkai a, a kaltlang an phal lo va, a bân an phal lo va. A hnuah a bânna lehkha a ziah chu minister pahnihin a chenna in atanga chhuakin an pawt chhe zui a ni.
Hetih lai hian Congress chief hlui, Rahul Gandhi chuan hmarchhak state hi a tlawh mek bawk a, party hruaitute bakah United Naga Council (UNC) hruaitu leh mipui huap pawl hrang hrangte nen Zirtawpni khan Imphal-a a thlenna khualbukah an inkawm niin Manipur Congress president Keisham Meghachandra chuan a sawi tih news agency ANI chuan a tar lang.
Manipur buaina chungchanga Prime Minister Narendra Modi a ngawi tlat mai an zawh chuan Gandhi-a hian he hmunah hian politics thil engmah sawi a duh lo tiin a chhang duh lo.
“Politics thil sawi turin ka lo kal lo va, he thila chutiang sawi ka tum lo. A rang thei ang bera muanna a awm leh theih hi ka duh awmchhun a ni,” a ti.
Gandhi-a hian tharum thawhna thlenga tuartu mipuite dinhmun a hmuh chuan a rilru a na tak zet tih a sawi.
Instagram-a a tar lan hnuhnung berah pawh Congress MP hlui hian, “Manipur-a tharum thawhna thlenga an duh tak leh an in leh lo chânte hmuh chu a hrehawm tak zet a. Ka mi hmuh apiangte hmelah chuan puih ngaia tap hmel a lang a ni,” a ti.
Buaina chhuahna hmunah muanna awm leh se a duh tih Gandhi chuan a sawi a, “Manipur-in a mamawh pawimawh ber chu muanna a ni a, mi chengte zalen leh him taka an chenna tur an mamawh a. Chutiang tur chuan kan zavaia kan tanrual a ngai a ni,” a ti.
Manipur-ah hian ni hnih liam ta chhungin tharum thawhna chhuak tharah mi pathum an thi leh tawh a, an zingah hian police constable pawh a tel.
Indian Army chuan Kangpokpi district-ah ralthuam kengten Haraothel khuaah khualbuk an kap niin an sawi a. An chhang let zui a, sipai pawhin awmchilhin boruak alh zel tur an veng niin an sawi.
Army thuchhuah chuan thi zingah Head Constable Lenglam Dimngel pawh telin kah hlum a ni tih an sawi bawk.
Manipur Police chuan darkar 24 liam ta chhungin silai 17, silaimu 12 leh bomb 10 an man tih an sawi a. Nilaini zan khan Kakching district-ah silai pariat, a mu pahnih leh bomb an man tih an sawi bawk.