Manchester United chuan Chelsea atang England midfielder Mason Mount lalut turin Pound maktaduai 55 in inremna an nei.
Mount lakluhna tura an inremnaah hian Pound maktaduai 55 an pek bakah Pound maktaduai 5 dang la pek belh thei an ni dawn a, a vaiin Pound maktaduai 60 in an inrem ang.
Kum 24 mi Mount hian Red Devils hnenah hian kum nga contract ziak turin inbiakremna an nei sa tawh a. Tun nipui a Erik ten Hag-a’n player a lakluh hmasak ber a ni dawn a. Season thar a UEFA Champions League an khelh tur thlirlawkin squad an tichhah.
Chelsea in season liamta chhung khan Pound maktaduai 600 player lakluh nan an hmang a, Financial Fair Play dan an bawhchhiat loh nan June 30 hma a player hralh an mamawh.
Mount hian kum 6 mi a nihin Chelsea hi a zawm a, an tan vawi 195 inkhel tawhin goal 33 a khung tawh.
United hian lei tumin vawi thum Blues hi an dawr hlawhchham a. Dawr zui an tum tawh loh hnuah Chelsea in inremna nei tura thutho an rawt.
Blues tana a khelh chhunga UEFA Champions League, FIFA Club World Cup leh UEFA Super Cup te chawi tawh Mount hi midfield-ah chhawr theihna a tam avangin United in an duh nia ngaih a ni.