Mizoram hmun hrang hrangah nimin khan India sorkar leh MNF in remna thuthlung an ziah champha vawi 37-na lawmna neih a ni a. A lawmna pui ber, Aizawlah chuan Chief Minister Zoramthanga hoin Remna Ni lawm a ni.
Vana pa Hall-a Remna Ni lawmna inkhawmah chief minister Zoramthanga chuan, remna nei tura beihna kawng a thui zia leh harsatna te leh vawiin ni thlenga remna leh muanna kan neih tak hi a hlutzia sawiin, “He remna hi kan puan zar kan zauh theihna tur leh a mamawhte tana remna palai kan nih ve theihna tura Mizo hnamte Pathianin a pek niin ka ring,” a ti.
Zoramthanga chuan Mizoram chu tunhmaa undivided India awptu British te’n India ram an chhuahsan dawn a India ramin danpui an siam khan Mizoram a huam tel ve loh, excluded area a nih thu a sawi a. Political party pawh nei ngailo in kum 1946-ah party din awih a ni a, 1947-ah India a independent dawn tak si ah khan politics a kum khat chauh a upa chuan mipui an kumkhaw awm dan tur thutlukna an siam a ngaih tak thu leh, chu thutlukna chu mi fing ber tan pawh siam thiam harsa tak a nih thu a sawi.
“Ngaihdan chi hrang nga lo awmin – Burma zawm emaw, Pakistan zawm emaw, India a tel emaw, British in la awpin crown colony a awm emaw, Independent a awm te a ni a. Chutah British an kian tak a Mizoram rorelna ruak ta karah India sorkar chu rawn zuang lut ta in, a nih dan turah ngaiin keini chu kan lo pawm mai bawk a, chu chiah chu kan rambuai thu bul chu a ni,” tiin, India ramin mipui duhthlannaa ram a indinna ram danpui bu an ziah lai khan Mizoram emaw Mizo mipuite hriatpui leh tel ve miah lo niin a sawiin.
Chief minister chuan Mizoram chu ram buai a puan a nih hnuah remna leh muanna a awm theih nan tan ina khung hial tawk khawp a kohhran lamin hma an lak dan te, tlawmngai pawl leh political party lam leh mipui inpekna thuk tak te chu fakawm a tih thu a sawi a. Mizoram remna hi thil chi hrang hrang lian leh te zawmkhawm hmanga siam, tawrhna kara chung lamin thilpek ropui Mizo mipuite a pek a nih thu a sawi bawk.
Inkhawm hi Chief Secretary Dr. Renu Sharma-in a a kaihruai a. MKHC Committee Member Rev. Lianhmingthanga Sailo, Central YMA President R Lalngheta te pawhin thu an sawi a ni.
Kumin June thla chhung hian sorkar ruahmanna in Remna Ni pualin thisen pek runpui te, khawtkai tihfai hnatlang te, thingphun runpui leh thil dang hrang hrang buatsaih a ni a. |halai leh zirlaite tan intihsiakna department hrang hrang kaltlanga buatsaih niin, he intihsiaknaa titha thlanchhuahte hnenah nimin khan Chief Minister Zoramthanga’n lawmman a sem a ni.