Tuirial Block I Congress Committee-in nimina Hortoki-a political training an buatsaih hmanpuitu, Mizoram Pradesh Congress Committee (MPCC) Vice President Lal Thanzara chuan MNF sorkarin an sorkar dawna an thil tiam an tihhlawhtlin leh si loh a bua siam tham a awm tawh tih a sawi.
MPCC Vice President chuan MNF sorkar chu chief minister berin sum a atchilh nasat em avangin, a cabinet minister-te pawhin an atchilh phah vek tawh a, sum an atchilh nasat avang hian an sorkar hma a mipui te hnen a an thutiam zawng zawng pakhat mah tih hlawhtlin an nei lo tih sawiin, “An thutiam an tih hlawhtlin loh hi a bu a siam tham a ni tawh,” a ti.
Lal Thanzara chuan BJP sorkar hnuaiah ram pum chu sawi loh, thenawm state leh Mizoram chhung ngeiah pawh politic avangin a buai mek tih a sawi a. BJP sorkar hnuaiah Kristian te’n harsatna an tawk mek a. Mizoram Synod pawhin tun hmaa a pek ngai reng reng loh income tax nuai eng emaw zat an pek a ngai mek niin a sawi a. Congress party chu sakhaw tih bik nei lo sakhaw zalenna duhtu party an ni tih an hriat a tul tih a sawi.
BJP hian Mizoramah MLA pahnih khat tal an neih theihna’n nasa takin an dap dawn tih sawiin Lal Thanzara chuan, “Sum pawh an theh chhuak tam ngam ka ring. Hei hi BJP-in an thawh pui MNF party an rin zawh tawh loh vang a ni,” a ti.
ZPM chung chang sawiin MPCC Vice President chuan, “Pu Lal Thanhawla ten an khum an ken hial pawn chhuat daia min mut tir a ti duh a, hetiang mi hi chief minister a nih ka ring lo a. ZPM hotu pakhat phei chuan ZPM hian MLA 21 hi nei ta ila, kan sorkar ka ring lo, kan buai em mai a ti, niin a sawi a. VUC an tih te pawh thlan tlin loh te thu hnuaiah thlan tlin an awm ngai lo a, tun atangin VUC thu hi MLA ten an palzut ngal char char a ni,” a ti bawk.
Block Vice President Remlalliana kaihruai inkhawmah hian AMC Corporator, MPCC Secretary ni bawk Rosiamngheta pawhin thu a sawi a ni.