Aizawl: ZPM Legal Department General Secretary Vanlalsiama Pachuau chuan MDC atanga kumin MLA inthlanpui lo awm tura Lawngtlai East bial-a an party candidate tur, Dr Lorrain Lalpekliana Chinzah paih tumna chu dan kalh a nih thu a sawi.
Nimina Lawngtlai Press Club-a thu thar thehdarhtute a kawmnaah Vanlalsiama Pachuau sawi danin, Dr Lorrain Lalpekliana Chinzah chu LADC-ah independent MDC niin, May 30, 2023 khan danin a phal angin ZPM a thlawpna Council Chairman hnenah hriattirna a theh lut a. June 12, 2023 khan ZPM-in Lawngtlai East-a candidate ni turin a puang a. Show cause notice a hmuh chhan chu ZPM party-in candidate ni tura puan a nih vang a ni tih tar lan a ni.
Vanlalsiama Pachuau chuan ADC te hian MDC member te ban an nihna tur leh MDC term pawh tawi theihna tur dan siam turin India danpuiin thuneihna a pe lo tih sawiin, “India danpuiah Sixth Schedule, Para 3 a tar lanah bak ADC te hian dan siam turin thuneihna an nei lo a. District council siamtu chu Sixth Schedule a ni a, Sixth Schedule kalh zawng emaw dodal zawnga dan siam chu District Council tan thil theih a ni lo va. Chuvangin, MDC disqualify theihna dan ADC-in a siam anih chuan India danpui kalh tlat a ni a, dan lo a thil tihna a ni bawk,” a ti.
Constitution of India, Sixth Schedule, Para 21-ah chuan Sixth Schedule hnuaia dan reng reng dah belh emaw, tihdanglam emaw, paih emaw tur chuan parliament chiahin thuneihna a neih avangin, dan siam hi High court thuneihna piah lam a nih thu a sawi bawk.
Vanlalsiama Pachuau chuan, “MDC-ten an party awmna chhuahsan emaw, independent MDC ten party an zawm avanga bân a nih theihna tur hi dan innghahna tur Constitution of India-ah hian a la awm loh avangin 125th Constitution of India (Amendment) Bill, 2019 chu tunah hian Parliament ah put luh tawh niin, ngaihtuah mek ala ni chauh a, a taka hman theih tur chuan he bill hian kawng thui tak zawh tur a la nei a, a tak ram thleng lo thei pawh a ni tho bawk,” a ti.
MDC atanga Dr. Lorrain Lalpekliana Chinzah paih chhuah tumna chhan tar lan te hi India danpui kalh tlat a nih thu a sawi a. LADC (CCB) Rules te zah tak chung leh danin a phal ang thlapin ZPM a thlawp tih sawiin, “Lawngtlai East atanga ZPM MLA candidate tur atana puan anih avanga MDC atanga Dr Lorrain-a paih tumna lo awm hi MNF kaihhruai sorkarah hian dan ang ni lo pawh a rorelna kalpui an hreh lohzia a tichiang hleah kan ngai,” a ti bawk.