Kum 40 chuang lai kal tawhah khan mizo politician lar leh ropui tak Pu A. Thanglura chuan ZORAM POLITICS, Belkeh phuarkhawm tui pai thei lo tih lehkhabu chhiar nuam tak, Mizoram politics vir vel dan a lo ziak tawh a. A hun laia kan ram politics pawh a hrilhfiah tha khawp mai. Pu Lura ziak ang deuh hian kan ram politics ah hian in siksawi, pawl keh rum rum, pawl chhung atanga inhnawhchhuah tih vel hian min chiah nasa tawh hle. Khawvel democracy kalphung pakhat a ni deuh ber bawk awm e. A bik takin regional party ah te hian a nghawng a na zual bawk.
Kan party lian pahnihMNF leh Congress pawhin hetiang buaina hi an hmachhawn ngun hle a. MNF party pawh pawl hniha inthenphawk te pawh an lo nei tawh a. President nihna inchuhin Pu Lalduhoma chu a lo per nawlh tawh a nih kha. Congress party pawhin buaina an nei zing mai a. Mahse, anni hi chu central lama hotu nei an nih avang hian an buaina hi a nep deuh thin.
Tunlai hian party ding thar ber ZPM chuan belkeh phuarkhawm tuipai thei lo nihna hun an tawng ve leh a. Congress leh MNF laka beng thlep tawh kalkhawmin an din a ni a. Mipui pawhin an lakah beiseina an nei sang viau. Mahse, Mizoram politics hri vei chhungkaw buaina chuan a tuam ve leh tan ta hlauh mai a. Nitina an thawm chu a chhunga awmte tana ngaihthlak nuam lo, an elpuite tana thehdarh chakawm a lo ni ve leh ta thung. ZPM a beiseina lo nei sang tawhte thinlung pawh a ti dul hle niin a lang. Tuna an dinhmun hi an siamthat vat loh chuan boruak hniam lam an pan zel dawn niin a lang bawk.
Kumin kum tawpah kan inthlang dawn a. Ruling party MNF hi mi tam takin an chhangkham viau tawh a. Congress party duh vak tawh lohna a awm bawk si. ZPM berin mipui rinna an tih beidawn si chuan kan inthlan turah hian tu takin sawrkarna siam ang maw tih a ni ta. Ruling MNF hian tha an la nei ber ang em aw tih theih a nih laiin an mite zingah an hotute a beiseina nei tawh lo, SEDP dawn huna chhuahsan tum thawm a ring ru viau bawk si. Congress party inhlawmkhawm tha chho mek pawhin hun tha an nei chho ve mai ang em tih pawh mi tam tak thlirna a lo ni leh ta. Eng pawh nise, kan politics kalphung pangngai, belkeh phuarkhawm chu kuminah hian kan hmu dawn a. Tui pai thei nia kan hriat lamah kan kal huk dawn niin a lang ta e.