Aizawl: Chief Minister Zoramthanga’n hnam thinlung put hi ram hung nan leh him nan a pawimawhzia chu ramin hun khirh a tawn changin a lo fiah zual thin thu a sawi.
Zirtawpni zana Vana pa Hall-a Mizo Zirlai Pawl (MZP) General Headquarters, Aizawl buatsaihin Remna Ni 2023 lawmna hmanpuitu, Chief Minister Zoramthanga chuan remna thuthlung ziah zan tluka mipui an hlim leh lawm kha Mizoramah sawi tur a la awmlo tia sawi thin a nih thu leh, hun kal zelah erawh chhan hrang hrang avangin remni ni pawimawhna a lo chul zel tak thu a sawi a. “Remna nei tura kalkawng biboh tak leh harsa tak te, thil thleng tam takte chu sawi zui a hlawh loh emaw, ngaihpawimawh a nih loh chuan kan history a thil pawimawh tak chu engmah lovah a chhuah theih a ni,” a ti.
MZP President Lalnunmawia Pautu pawhin thu sawiin hnam dang pasal nei te, sap pasal a a ni emaw, vai a ni emaw pasal neite ram rorelna sangah tthut tuma bei an awm tih sawiin, “MZP chuan ngun takin a ngaihtuah a, kan pi leh pu, kan sipai huaisen, hnam pasalthaten zalenna, rorelna kan neih an sual chhuahah hian an thut ve kan rem ti lo,” tia sawiin, theihtawpin an theihna apiangah an dodal zel dawn tih a sawi.
MZP Vice President Andrew F. Lalramnghaka kaihhruai inkhawmah hian rambuai laia remna zawnga kohhranin theihtawp chhuah a tha a thawh avangin kohhran hmingin Mizoram Kohhran Hruaitute Committee (MKHC) hnenah chawimawina hlan a ni.