Union Defence Ministry chuan nimin khan indo thlawhna thar 33 leina tur a pawm a, fighter aircraft lei tur zingah hian Su-30 MKI 12 leh MiG-29 thar 21 leina tur bakah MiG-29 a neih lai 59-te tihchangtlun (upgrade)-na tur a tel bawk a, hei hi Rs Vaibelchhe 18,148 man tur a ni.
Defence ministry-in thuchhuah an siamah, “Hun rei tak ata tawh Indian Air Force-in indo thlawhna tam zawk an mamawhna chu hriain DAC chuan MiG-29 thlawhna 21 leh MiG-29 a neih sa 59-te thuam chakna tura rawtna a pawm.
Hei bakah hian Su-30 MKI thlawhna 12 leina tur a pawm bawk,” tiin a tar lang.
Thu hi Defence Minister Rajnath Singh-a kaihhruaina Defence Acquisition Council (DAC) thutkhawm zawhah an chhuah.
Russia atanga MiG 29 lei belhna tur leh tihchangtluna tur man hi Rs Vaibelchhe 7,418 a ni dawn a. HAL hnen atanga Su-30 MKI leina tur hi Rs Vaibelchhe 10,730 a ni ve thung.
Hetianga defence ministry-in thutlukna an siam hi tun laia Line of Actual Control (LAC) hrul, Ladakh-a Indian leh Chinese sipaite chawlhkar eng emaw zat an inep mek hun lai a ni.
DAC hian Indian Armed Force-in an hmanrua leh thil dang dang an leina tur leh an thuam chakna tur eng emaw zat a pawm bawk a, hei hi Rs Vaibelchhe 38,900 man zet tur a ni.
Heng zingah hian IAF Indian Navy tana Astra Beyond Visual Range air-to-air missile 248 leina tur pawh a tel a. DRDO-in a duan leh a buaipui mek, km 1,000-a hla kap thei, Land Attack Cruise Missile leina tur pawh a tel.
“Heng missile system lei leh tihchak turte hian service chi thumte missile lamah a tichak dawn a. Pinaka missile system ruahman mek pawh hian a lo awm tawh sa, Long Range Land Attack Missile System chu a tichangtlung lehzual dawn a ni,” an ti.