BJP ep tura party dangte nena tanhona tura thawhhlawk tak leh buai ber, Sharad Pawar chuan hun khirh a tawng leh ta a. Maharashtra-ah ama din party ngei atangin a fapa leh a thuihhruaiten rorel BJP sorkar thlawpin Pathianni khan minister atan lak luh an ni.
Nationalist Congress Party (NCP) dintu hi a unau fa, Ajit Pawar-a leh a hote mi pariat chuan BJP kaihhruai sorkar thlawpin amah chu deputy chief minister atan lak luh a ni.
Maharashtra-ah hian BJP chuan kum hnih chhungin a vawi hnih nan anmahni epa tangrual, Maha Vikas Aghadi (MVA) an tih chu an thiat leh ta a. A hmasa zawkah khan Eknath Shinde chuan Shiv Sena MLA 40 zet chhuahpuiin BJP nen an thawkho zui a, sorkar an siam phah a ni.
Ajit Pawar-a rual hian an hruaitu dang pariatte chuan Shinde-a sorkar hi an zawm veleh ta a, deputy chief minister atan lak luh niin BJP hruaitu, Devendra Fadnavis nen he nihna hi an chelh dun ang.
NCP atanga sorkar zawmtute hi Ajit Pawar bakah tun hnai lawka Supriya Sule-i nena working president atana ruat, Praful Patel pawh a tel a. An hruaitu lawk tak tak dang – Chhagan Bhujbal, Dilip Walse Patil, Hasan Mushrif, Ramraje Nimbalkar, Dhananjay Munde, Aditi Tatkare, Sanjay Bansode, Dharmrav Baba Atram leh Anil Bhaidas Patil ten zuiin minister atan lak luh an ni.
Tun hnai lawkah Fadnavis-a hian Maharashtra cabinet chu tihlen a ni dawn tih a lo sawi tawh a, a thleng dik ta a ni.
Shinde hian tun hnaiah Delhi-a BJP hruaitute a hmu bawk.
April thla khan Shinde-a hian Ajit Pawar-a leh NCP MLA-ten an zawm a nih chuan sorkar atanga a chhuah tur thu a lo sawi tawh thung.
“Tunah chuan chief minister pakhat leh deputy chief minister pahnih kan nei ta a. Double-engine sorkar kha triple engine a ni ta a. Maharashtra hmasawnnatur atan Ajit Pawar leh an hruaitute kan lo lawm a. Ajit Pawar-a tawnhriat hian min pui dawn a ni,” tiin lak luh inkhawm zawhah a sawi.
Sharad Pawar-a hi tun hnaiah an party chief a nihna atangin a chawl thut a, a fanu, Sule-i chu a dinhmunah kaiin Ajit Pawar chuan state assembly-ah opposition leader nih zui chu a tum loh thu a sawi ve bawk.