Mizoram Amateur Taekwondo Association chuan District Association ten hma an sawn theihna tur ngaihtuahin an tlawh chhuak a, June ni 28 atanga ni 30 chhung khan Mizoram Chhimlam district pali – Hnahthial, Siaha, Lawngtlai leh Lunglei te an tlawh.
Zirtawpni khan Hnathial District tlawhin Hnathial ah Taekwondo zirna kalpui dan tur ruahmanna, Vanlalrema Secretary HDATA kaihhruaina hnuaiah siamho a ni a, Hnathial District Amatuer Taekwondo Association President ni lai boral ta PC Vanlalrema sunna leh ralna hun hman a ni.
Hemi ni vêk hian MATA hruaituten Siaha leh Lawngtlai te an tlawh zui leh a. Chawhma lamah A.Thazi SDATA President kaihruainain District Association hmalakna tur hrang hrangte an sawiho a ni a, Siaha Taekwondo Academy tlawhin an turte enho nghal bawk.
Chawhnu lamah Lawngtlai-ah Lawngtlai DATA te nen meeting neih ho leh a ni a. Taekwondo Dojang tih changtlun dan turte sawiho niin Vice President Lalhmachhuana’n LDATA kalphung a sawi.
LADC Chairman VL Hmuaka’n hmanpuiin LDATA te tan theih tawp chhuah a tum thu a sawi bawk.
Lawngtlai ah hian colour belt exam neih nghal a ni a, zirlai 12 ten tha takin exam an paltlang. Lunglei District Amateur Taekwondo Association lamah pawh District Sports & Youth Hallah District Taekwondo hmasawn dan tur sawiho leh a ni a. Taekwondo training-te en ho niin district mamawh hrang hrangte tihhlawhtin dan turte MATA hruaitute nen an sawiho nghal bawk.
MATA Promotional Tour-ah hian Master VL Sawma Senior Vice President, Master Joseph Thansanga General Secretary, Technical Board Member Albert Lalrinfela leh Lianthangpuii te an kal a. District hrang hrang atanga player tha an chhinchhiahte chu Mizoram Senior leh Cadet team atan remchang hmasa bera kohkhawm an tum a ni.