Meitei ralthuam keng mi thahnem takin tribal-te chenna, Langza leh Chinglangmei khua luhchilhin silai an hmet puak a. He inkahnaah hian thi leh hliam eng emaw zat an awm.
The Zozam Times thudawn danin Imphal atanga km 70 vela hlaa tlangmite chenna khua, Lamka district chhunga Samulamlan block hnuaia awm, Langza leh Chinglangmei khuate chu ralthuam tha tak tak keng Meitei eng emaw zatin Pathianni zing dar 12 vel atang khan luhchhuah tumin an kap tan a. Hemi atang hian nimin chhun thleng khan silai puak ri hriat tur a awm.
Nimin tlai thleng khan he inkahnaah hian Meitei lam mi pasarih an thi tawh a, tlangmi pakhat thi a awm niin Lamka atanga thudawnnain The Zozam Times a hrilh.
Meitei-te hi Arambai Tenggol mi leh sa nia hriat an ni a, kawr dum an ha deuh vek bawk a. Anni bakah an hnungzuitu, Arambai Tenggol leh Meitei Leepun pawl hnuaia Meitei hmeichhia, firfiak taka che thin, Meira Paibis-ten truck 20 velin an zui nia sawi a ni a. Meitei-te hian khaw chhunga chenna in 26 leh sakhaw biak in pathum – Independent Church of India, Evangelical Assembly Church leh Reformed Presbyetrian Church an hal sak bawk.
Pathianni zing lam atanga inkahna a thlen lai hian village tribal volunteer-ten Meitei-te hi lo dan tum mah se, an thathnem tham em avangin volunteer zinga hmeichhe pahnih leh mipa lo awm eng emaw zatte chu inhnukdawkin an tlan chhe hman a. Mahse, tlangmi pakhat, David Hmar erawh insaseng hma loin Meitei hian a nung chungin an man hnuah rawng taka thatin a lu chu thlanmualah an khai nia thudawn a ni.
Hetih lai hian nimin zing lam khan Meitei-te do let turin village volunteer an inchahkhawm leh hnuah, Pathianni nilengin Samulamlan block chhunga khua leh a chhehvelah silai puak ri a khât tawka hriat tur a awm niin a sawi bawk.