Aizawl: Mizo National Front (MNF) party chuan ‘Pathian nen lo chuan ka kal ngam tawh lo’ titu MNF senior vice president leh deputy chief minister ni bawk, Tawnluia chu nationalism khai dingtu ban pawimawh tak a nih thu sawiin, an chhuan thu an sawi.
Inrinni khan Aizawl Press Club-ah thu thar thehdarhtute kawmin MNF Media & Publicity hotute’n chuan Deputy chief minister Tawnluia department chan hnuaia hmasawnna hnathawh hrang hrangte an sawi a. July 26, 2021-a Assam in Mizoram ramri rawn lut a, duty post an luhchilh tum khan Tawnpuia hian, ‘Kan duty post hi tlai dar 5 hmain engti zawng pawhin kan la let leh tur a ni’ a tih angin Chief Minister Zoramthanga nen an sawi dun hnuah silai a puak ta a, Mizoram ramri la let mai ni lovin, Mizoramin ramriah nasa takin hma a sawn phah ta tih an sawi.
MNF Media & Publicity General Secretary VL Krosshnehzova chuan Deputy CM chu a kum lam lo tam deuh tawh mah se, a department enkawl a hneh em em tih sawiin, “Zirna lamah Science subject background nei a lo ni bawk nen, technical thil thlengin a hre bel hneh em em a. Ani hona hnuaiah hian PHE, UD&PA leh Personnel & Administrative Reforms chuan hma a sawn nasa em em a. Zoram tan hna ropui tak tak leh chhinchhiah tlak tak tak thahnem tak an thawk a ni,” a ti.
VL Krosshnehzova sawi danin PMAY (Urban) – Housing for all hnuaiah in sakna pek mi 5,026 pek tawh niin, in sak zawh tawh 2,309 a awm tawh a. Shelter for urban Homeless (SUH) district 10-ah Shelter 11 sak thar a ni a. Home 85 hnenah tanpuina pek an ni a. Shelter sak mek pathum a awm bawk.
DAY-NULM – National Urban Livelihood Mission Emplyment Through Skill Training & Placement (EST&P) hnuaiah tun hnai kum thum chhungin mi 3,220 zirtir chhuah tawh an ni a. An zingah mi 1,583-in eizawnna atan an hmang tawh a ni.
Parking House Support Scheme (PAHOSS) hnuaiah mi 11-in felfai taka zovin third & final installment pek tawh an ni a. Tun dinhmunah PAHOSS beneficiary, inremna siam pui theih, 1st Installment, 2nd Installment leh 3rd Installment pek mai theih mi 201 an awm. Hemi atan sum pek chhuah tur zat hi Rs. 1,036.90 lakh a ni.
Swachh Bharat Mission hnuaiah Mizoram hi hmar chhak-a pali-na turin pawn lera inthiar awm lohna (ODF) state-ah puan a lo ni tawh a. Baseline survey 2012 angin inthiarna (toilet) sak tur target 30,067 chu sak tihpuitlin vek tawh a ni a. Mizoram chu pawn lera inthiar awm lohna Open Defecation Free (ODF) State 13-na a ni.
SEDP 2019-20 huam chhunga sanction Rs. nuai 6,000 atangin hna lian tak tak 900 chuang thawh mek leh thawh zawh tawh a awm a ni. Special Central Assistance hnuaiah Land Development of Solid Waste Management Centre khaw pangaah thawh mek a ni bawk.
NLCPR hnuaiah Sainik School, Chhingchhip tuilakna lian tham tak peih fel a ni tawh a, Dam Reservoir & Development of Recreation Centre, Keilungliah-ah Rs. 1,988 lakhs senna tur pawh zaa 91.60 thawh zawh tawh a. Rs. 1,141.96 crore senna tur Alternative Gravity Water Supply Schemes of Aizawl (AGWSSA) pawh zaa 70.04 thawh tawh a ni a. Khaw hrang hrangah Greater Water Supply Scheme hnuaiah tuilakna peihfel tam tak a awm tawh a ni.
SIPMIU hnuaiah Water Supply hian tui semna pipe km 309.04 siam thatna leh siam belhna hnathawh a ni a, he hmalakna hi kalpui mek hi zaa 92.36 zawh tawh a ni a. Aizawl Smart City hnuaiah project 17 thawh a nih bakah project lian tak tak 16 tender mek niin, DPR siam mek project pali a awm bawk.
VL Krosshnehzova chuan sorkar kal tawh leh sorkar mekte engmah thawk lo anga party thenkhatin an puhna chu heng hmasawnna hnathawh tam tak atangin a dik lohzia a lang chiang hle tih sawiin, “Sorkar tih that hmu thei miah lo opposition-te mit fiah lo karah, MNF kaihhruai sorkar chuan chak takin hma a sawn mek zel a ni,” a ti.