Zirtawpni zana Reiek kai, Tlawng bul Dihmunzawl thlam pakhata ruang chhar thattu a puhte chu nimin khan Aizawla district court-ah hruai an ni a, police-in an la kawl rih dawn.
Tualthattua puh, Lalroliana (43) leh a nupui, Lalsiampuii (40) te hi thu zawt fiahtu police-te hmaah an inpuang tawh niin Aizawl district Police hotute hnen atangin thu dawn a ni a. Inpuang lo mah se thil thlen dan hi chhui chian a nih tawh thu Aizawl SP chuan a sawi.
Police hnena an sawi danin nupa an ni a, thi ta Vanlallawma (55) te nen hian an inkawmho ţhin a. Lalroliana hian Vanlallawma hi a nupui, Lalsiampuii nen an awm dan duh lovin, thikthu avangin tum lawkna pawh awm loin a vaw hlum niin an sawi a ni.
Vanlallawma ruang hi Zirtawpni zan khan YouTube-a tihchhuah tur ramhuai zawngtuten thlamah hian an hmu a. Police hriattirin zawn hna thawh nghal a ni a. Nimin khan tlanbo an tum laiin Seling daiah man an ni a. Nimin khan court-ah hruaiin court hian darkar 48 chhung police-ten an hren zui a phalsak a ni.