Aizawl: Mizoram sorkarin sorkar laipuia Manipur atanga raltlante tanpuia enkawlna tur pawisa a dil chu ni 40 hnuah pawh sorkar laipui hi a la ngawi reng a, state sorkarin raltlan buaipui tura a din committee-in veh bur an khawn tan dawn.
Home department hotuten an sawi danin Manipur raltlante tanpuina tura sum dil chungchangah hian sorkar laipuiin chhanna mumal an la pe lo a, tun hnaiah Mizoram sorkarin lam kal tirin sorkar laipui hotute an hmuh hnuah pawh Delhi atangin thu leh hla dawn a la ni lo.
Tar lan tawh thin angin Chef Minister Zoramthanga’n May 23 khan sorkar laipuiah Manipur raltlante puihna tur sum an dilna hi a lo theh lut tawh a ni.
Home department hotute chuan Mizoram sorkara finance department-ah Manipur atanga raltlante tanpuina tur sum hi an dil mek thu leh an hmuh ngei an beisei tih an sawi a ni.
Mizoram sorkar din, Executive Committee on Internally Displaced Persons of Manipur in Mizoram chuan vawiin atangin minister te, MLA te leh sorkar official-te hnen atangin veh bur hi an khawn tan dawn a ni.
May 3-a Manipura tual chhung buaina a chhuah hnu lawk, May 5 atang khan Zofa eng emaw zat chu an sahimna zawngin Mizoramah an tlan lut a, tunah hian mi 12,000 vel an awm mek a ni.